Notícies Veir istoric
Ua grèu pana en sistèma de refrigeracion dera pista de gèu deth Palai obligue a barrar-la per temps indefinit
Er Ajuntament de Vielha e Mijaran ja trabalhe damb es equips tecnics entà trapar ua solucion e avalòre era possibilitat de sosméter a un procès de participacion ciutadana era solucion a aplicar ad aguesta installacion deth Palai de Gèu
Er Ajuntament de Vielha e Mijaran a barrat temporaument era pista de gèu deth Palai dempús d’auer detectat ua grèu pana en sistèma de refrigeracion ena madeisha pista. D’aguesta manèra, queden suspenudes tot tipe d’activitats que s’amien a tèrme abituaument ena pista de gèu enquia nau avís per part dera institucion.
Des deth consistòri se trabalhe damb es tecnics entà poder arténher era solucion avienta entà poder apariar aguesta incidéncia. Eth govèrn municipau s’a amassat damb es representants des diuèrsi grops politics dera institucion entà transméter era situacion actuau der estat dera pista de gèu. Ath delà, tanben s’a dat er avís as usatgèrs dirèctes dera pista entà qu’agen coneishença sus eth sòn barrament.
Segontes eth baile de Vielha e Mijaran, Juan Antonio Serrano, “dempús d’auer detectat aguesta pana en sistèma de refrigeracion ena pista de gèu, mos vedem obligadi a barrar temporaument era pista, entà per’mor de trapar ua solucion ath problèma”. Serrano higís qu’“aguesta installacion a patit ath long deth temps fòrça incidéncies e actuament eth sistèma de refrigeracion se trape obsolèt”. Atau madeish manifestaue que “er equip de govèrn de Vielha e Mijaran va a hèr tot çò que sigue possible entà trapar ua solucion viabla tath futur dera pista de gèu”.
En aguest sens, er equip de govèrn a manifestat que tanben va a avalorar era metuda en foncionament d’un procès de participacion ciutadana que, un viatge coneishudes totes es opcions possibles, pogue decidir sus eth futur dera pista de gèu. Atau madeish Serrano higie que “era rèsta d’installacions deth Palai de Gèu foncionen damb normalitat e des deth consistòri demanam desencuses pes inconvenients qu’aguesta pana provòque” e “èm conscients dera grana importància qu’eth Palai de Gèu a entath nòste municipi e tà tota era Val d’Aran e, pr’amor d’aquerò, vam a trabalhar intensament entà mantier toti es servicis que siguen possibles”.
19/06/2018