Notícies Veir istoric
Vielha e Mijaran aurà ua estacion de trail e d’esquí de montanha
Aguest projècte vò méter en valor eth potenciau toristic, naturau e esportiu deth municipi e es sòns pòbles, e compdarà damb ua plana web e ua App a on s’i traparà tot tipe d’informacion de besonh entàs usatgèrs
Er Ajuntament de Vielha e Mijaran a presentat en ua amassada damb es alcaldes pedanis eth projècte d’estacion trail e estacion d’esquí de montanha que compdarà damb diuèrsi circuïts e trauèsses peth municipi. Aguest projècte preten revalorizar es desparièrs espacis naturaus qu’a eth municipi, en tot potenciar es rotes existentes e fomentar era practica der esquí de montanha e raquetes.
Era estacion trail e d’esquí de montanha s’enmèrque laguens des accions deth projècte de cooperacion interfronterèra Interreg-Poctefa “Reiaume der Aneto” que Vielha e Mijaran compartís damb es municipis de Luchon e Benasque. Per çò que hè ara estacion de trail se preten que sigue interconnectada damb era de Luchon e era que Benasque tanben dessenhe actuaument.
Maria Vergés, dusau tinent d’alcalde der Ajuntament de Vielha e Mijaran, manifestaue que “aguest Interreg-Poctefa mos va a perméter crear aguesta estacion, que non a de besonh mès qu’un punt fisic d’informacion e acuelhuda, entà que sigue un privat, a trauès de concors public, qui la gestione en base a uns critèris preestablidi peth municipi” e higie que “atau donc sajam de crear e potenciar era activitat sociau e economica en municipi”.
En çò que tanh ara execucion deth projècte, un viatge es pedanies agen dat era sua autorizacion oficiau, s’amiarà a tèrme era senhalizacion des rotes e se netejaràn es camins que siguen de besonh. Per un aute costat, era practica der esquí de montanha e raquetes ei fòrça abituau en conjunt dera Val d’Aran, e damb aguesta accion se revitalizarà er encastre der antic Espitau de Sant Nicolau, ena Boca Sud deth Tunèl de Vielha. Ua adequacion qu’ei prevista tanben n’aguest projècte Interreg Poctefa.
Laguens des accions a amiar a tèrme damb era estacion de trail e esquí de montanha se contemple era abilitacion d’ua plana web e d’ua app, a on s’i traparà tot tipe d’informacion qu’age de besonh eth visitaire entà poder gaudir d’aguesti espacis.
Ath delà, es autes destinacions que hèn part deth projècte POCTEFA, Benasque e Luchon, tanben haràn promocion deth projècte de Vielha e Mijaran, entà poder aufrir ua aufèrta potenta a nivèu toristica e esportiva entre eres enes Pirinèus. Entà Vergés “ei fòrça important potenciar era collaboracion e relacion entre es tres territòris qu’an rèptes comuns que pòden afrontar amassa entà superar-les damb èxit”.
Un viatge acabada aguesta prumèra fasa de dessenh e execucion dera estacion trail e d’esquí de montanha, er Ajuntament de Vielha e Mijaran treirà a concors era gestion deth madeish e se prevé que pogue meter-se en foncionament a finaus de 2019.
21/06/2018