Notícies Veir istoric
Er Ajuntament de Vielha e Mijaran comence es trabalhs d’adequacion der airau ludic deth Prat de Teishineret
En aguest endret de Vielha s’i plaçaràn diuèrses taules entà poder-i minjar, atau coma apariar es barbacoes existentes damb es sues campanes, e eth bastiment d’un com
Pendent aguesta setmana, eth govèrn municipau de Vielha e Mijaran a començat es òbres d’adequacion deth parçan deth Prat de Teishineret de Vielha (Cap dera Vila). Aguesti trabalhs consistissen en plaçament d’un totau de 6 taules cimentades entà qu’era gent i pogue minjar, e tanben er apariament des barbacoes ja existentes, en tot meter-i es campanes e eth bastiment d’un com.
Aguestes òbres en Prat de Teishineret s’alongaràn pendenet ua auta setmana, e compden damb un pressupòst de 21.842€, aprovat ena 2au modificacion de credit d’aguesta primauera.
Segontes eth còsso d’Infraestructures, Òbres e Servicis de Vielha e Mijaran, Jacint Cuny, “era intencion deth govèrn municipau ei que pendent aguest mes de junhsèga aguesta zòna de picnic ja sigue prèsta entà qu’era gent pogue gaudir d’un espaci public ar aire liure apròp de Vielha. Damb eth bon temps der ostiu, aguest airau serà de fòrça profit entà toti aqueri que volguen gaudir d’ua jornada en plea natura”. E hig “qu’ère plan de besonh endreçar aguest prat, en tot deishà’c enes condicions avientes”.
Era bona situacion financèra der Ajuntament de Vielha e Mijaran permet que pendent aguest an se poguen desvolopar diuèrses òbres de govèrn coma aguesta.
04/07/2018