Notícies Veir istoric
Er Ajuntament de Vielha e Mijaran inície eth procès de modificacion dera Ordenança Municipau Reguladora dera Participacion Ciutadana
Er objectiu ei potenciar ua administracion basada ena proximitat e era transparéncia coma valors fonamentaus, en tot fomentar era participacion dera ciutadania
Er Ajuntament de Vielha e Mijaran a metut en foncionament eth procès de modificacion dera Ordenança Municipau Reguladora dera Participacion Ciutadana. Eth consistòri preten modificar-la entà adaptar-la ara realitat vigenta e regular eth conjunt de normes entà hèr possible era participacion dera ciutadania enes ahèrs collectius.
Atau madeish, er Ajuntament vò concretar eth sòn compromís damb era potenciacion d’ua administracion basada ena proximitat e era transparéncia coma valors fonamentaus, e garantir eth respècte ara defensa des drets individuaus e collectius, melhorar era democràcia locau e fomentar era participacion ciutadana.
Eth borrolhon dera prepausa de modificacion d’aguesta ordenança municipau se pòt consultar en Departament de Secretaria der Ajuntament de Vielha e Mijaran.
Segontes eth baile der Ajuntament de Vielha e Mijaran, Juan Antonio Serrano, “ei dubèrta era consulta publica sus era modificacion dera Ordenança Municipau Reguladora dera Participacion Ciutadana, entà que quinsevolh persona interessada pogue aportar e presentar es suggeriments que creiguen convenents”.