Notícies Veir istoric
Er Ajuntament de Vielha e Mijaran inície ua campanha entà prebotjar eth civisme en municipi
“Eth carrèr, un espaci de toti e entà toti” ei eth lèma dera campanha municipau que se meterà en foncionament aguest ostiu
Er Ajuntament de Vielha e Mijaran amie a tèrme ua ambiciosa campanha a compdar d’aguest ostiu entà promòir eth civisme e era conviuença ciutadana en conjunt deth municipi. Jos eth lèma “Eth carrèr, un espaci de toti e entà toti”, eth govèrn municipau preten qu’era ciutadania prene consciéncia dera importància deth suenh des espacis publics.
Era intencion ei arténher qu’era gent s’implique enes ahèrs publics dera vida vidanta coma ei eth respècte pes installacions, eth suenh des carrèrs, amiar es cans estacadi, respectar eth descans des vesins e emplegar es trepaders entà caminar, entre d’autes accions.
Ath delà, cau rebrembar qu’ei en foncionament era App de participacion ciutadana a compdar der an passat, a trauès dera qu’es vesins pòden informar ar ajuntament sus es incidéncies o desperfèctes que se pòden ocasionar en quinsevolh moment. Un esturment entà que i age ua comunicacion dirècta entre era gent e eth consistòri, entà qu’aguesta conviuença ciutadana sigue era melhor possible. Alberto López, còsso de Naues Tecnologies avalòre fòrça positivament er impacte d’aguest nau esturment pr’amor que “facilite qu’es vesins e vesies deth municipi contacten damb er Ajuntament de forma facila e dirècta”.
Segontes era dusau tinent d’alcalde, Maria Vergés, “damb aguesta campanha volem arténher era implicacion dera ciutadania enes ahèrs collectius en tot impulsar eth civisme coma un valor sociau de prumèr orde” e higie que “era participacion ciutadana ei un des elements clau d’ua societat desvolopada e pr’amor d’aquerò sajam d’amiar endauant iniciatives que la prebotgen”.
Era campanha constarà de diuèrses infografies que seran difonudes enes hilats sociaus e ena plana web der ajuntament, atau coma en format papèr despartides per punts estrategics deth municipi.
18/07/2018