Notícies Veir istoric
Vielha e Mijaran, scenari de dues etapes dera 4au edicion dera Campilaro Pyrénées 2018
Aguest dissabte 21 de junhsèga era 3au etapa acabarà ena Bassa d’Oles e, dimenge 22, era darrèra etapa gesserà de Vielha en direccion a Les Agudes
Pendent aguesta dimenjada, Vielha e Mijaran torne a recéber un an mès era pròva ciclista Campilaro Pyrénées. Aguesta competicion que trauèsse 330 kms enes Pirenèus, artenh era sua 4au edicion, e a Vielha e Mijaran coma protagonista de dues etapes. Per un costat, aguest dissabte 21 de junhsèga, era 3au etapa damb gessuda en Luchon, arribarà ara Val d’Aran peth Pòrt deth Portilhon, en tot finalizar ena Bassa d’Oles dempús de completar 41 kms. E, dimenge dia 22, era 4au e darrèra etapa, gesserà de Vielha e anarà direccion tà França en tot pujar un aute viatge eth Pòrt deth Portilhon, e finalizarà en Les Agudes dempús de disputar 108 kms.
Per tant, pendent dus dies, eth municipi receberà a lèu 200 participaires d’ua pròva ciclista cuèrta mès damb fòrça dificultat pera orografia des Pirenèus damb etapes de mieja e nauta montanha. Ath delà de pujar dus viatges eth Pòrt deth Portilhon, tanben pujaràn Superbagnères, eth Col de Menté, Bourg-d’Oueil, eth Pòrt de Balés o Les Agudes. Toti eri pòrts damb tradicion en competicions coma eth Tour de France o la Vuelta Ciclista a España, de prumèra categoria o de categoria especiau.
Segontes eth còsso d’Espòrts de Vielha e Mijaran, Alberto López, “èm contenti de poder acuélher un an mès era Campilaro Pyrénées en nòste municipi. Ua pròva ciclista damb ua dificultat fòrça importanta, que permeterà as sòns corredors trauessar espacis naturaus tanplan polidi coma eth Plan Batalhèr o era Bassa d’Oles, lòc d’arribada d’ua des etapes”.
20/07/2018