Notícies Veir istoric
Aguest dimenge an finalizat es 19au colònies d’ostiu de mainatges damb càncer dera AECC ena Val d’Aran
Er Ajuntament de Vielha e Mijaran collabòre annaument entà qu’un centenat de mainatges poguen gaudir d’aguestes colònies e tanben tà que fòrça gent damb càncer pogue auer ua atencion psicologica e de fisioteràpia en municipi
Aguest dimenge 22 de junhsèga, a finalizat ua naua edicion des colònies d’ostiu que cada an organize era Asociación Española Contra el Cáncer de Lleida (AECC) ena Val d’Aran. Enguan, aguestes colònies ja an celebrat era sua 19au edicion, damb era preséncia d’un centenat de mainatges e mainades d’entre 7 e 17 ans vengudi de diuèrses parts d’Espanha.
Coma cada an, er Ajuntament de Vielha e Mijaran a collaborat entà qu’aguestes colònies s’agen podut amiar a tèrme, en tot ajudar en tot çò de besonh entà que pendent ua setmana, aguesti joeni que patissen malauties oncologiques, agen gaudit deth territòri damb un pialèr d’activitats.
Er Ajuntament, ath delà de collaborar annaument damb era realizacion d’aguestes colònies dera AECC, tanben a un papèr fonamentau damb eth càncer en dia a dia. En aguest sens, en 2016 signèc un convèni damb era AECC-Catalunya Contra el Càncer damb eth quau se preten desvolopar activitats de divulgacion e conscienciacion sus aguesta malautia e era sua prevencion pendent tot er an.
Ath delà, damb aguest convèni, er Ajuntament cedic un espaci fisic ara Junta Locau dera AECC ena Val d’Aran entà que pogue atier es consultes ara ciutadania e amiar a tèrme servicis d’atencion psicologica. E, tanben se lis permet auer ua persona que pogue desvolopar trabalhs de fisioteràpia entà hemnes operades de càncer de popa.
Segontes era còsso d’accion sociau der Ajuntament de Vielha e Mijaran, Maria Vergés, “èm fòrça satisfèti dera collaboracion que cada an auem damb era AECC entà ajudar a que se poguen hèr causes tanplan importantes coma son aguestes colònies d’ostiu e tot eth trabalh d’atencion qu’era Junta Locau dera Val d’Aran preste en nòste territòri, pr’amor qu’amien a tèrme un prètzhèt d’un valor incalculable”.