Notícies Veir istoric
Vielha e Mijaran reclame ara Generalitat qu’arture es retalhades en educacion en municipi
Er Ajuntament a hèt arribar per escrit as Servicis Territoriaus era demana dempús de coneisher-se es naues retalhades de professorat previstes entath pròplèu cors en INS d’Aran e era Escòla Garona
Er Ajuntament de Vielha e Mijaran a transmetut era sua preocupacion ara Generalitat de Catalunya pes retalhades de professorat previstes entath pròplèu cors escolar autant en INS d’Aran coma ena Escòla Garona.
Era intencion dera Generalitat ei amiar a tèrme era eliminacion dera 4au linha dera ESO en INS d’Aran. Aguest hèt, amassa damb era retalhada de professorat pendent eth passat cors e en pròplèu ena Escòla Garona, provòque ua grana preocupacion en Vielha e Mijaran. En aguest sens, eth consistòri a enviat ua carta ath director des Servicis Territoriaus d’Ensenhament de Lleida, Carles Vega, entà demanar-li que s’arturen aguestes retalhades.
Segontes eth baile de Vielha e Mijaran, Juan Antonio Serrano, “Es nòsti centres educatius son eth maxim exponent d’un modèl d’escòla, eth dera Escòla Aranesa, que compde damb ua ampla trajectòria fòrça positiva. Un modèl qu’a sabut amiar entà deuant un projècte que gestione tres lengües oficiaus, era sisau ora en educacion infantila e primària e un centre de tecnificacion per çò que hè ar Institut”.
Pera sua part, era còsso d’Ensenhament, Maria Vergés, lamente aguestes retalhades “pr’amor que condicionen enormement era corrècta gestion des nòsti centres educatius, que coma ja coneishen, diferíssen dera rèsta de centres de Catalunya, e en conseqüéncia, eth futur des nòsti mainatges e mainades”.
23/07/2018