Notícies Veir istoric
Inagurada era dusau fase d’òbres ena entrada de Vielha
A on lutz ua gran crotz occitana
Deluns 29 de seteme s’inaugurèc era naua entrada de Vielha damb ua plaça a on lutz ua gran crotz occitana, damb motiu dera hèsta de Sant Miquèu, patron deth municipi, e tanben se realizèc era tradicionau missa ena glèisa de Sant Miquèu.
Era vrespada hestiua comencèc damb era inauguracion des òbres dera dusau fase dera entrada de Vielha, a on s’an assolidat infrastructures e melhorat es trepaders, canalizacions de servicis, redistribuït e cambiat eth paviment deth parcatge e s’a elaborat ua petita plaça damb ua enòrma crotz occitana.
Eth baile de Vielha, Alex Moga, declarèc ena presentacion que “damb aguesta òbra auem integrat dus barris dera vila de Vielha e ath delà auem dignificat era entrada deth cap-lòc d’Aran”. Ena inauguracion tanben siguec presenti representants deth Conselh Generau d’Aran.
Ara seguida se celebrèc era missa en aunor a Sant Miquèu ena glèisa que pòrte eth sòn madeish nòm, en centre de Vielha. En finalizar era celebracion religiosa i auec còca e cava entà toti enes cubèrts der Ajuntament de Vielha.
29/09/2014