Notícies Veir istoric
Eth pas deth Tour de França pera Val d’Aran ena etapa d’aguest dimars dèishe ua repercusion economica de 150.000€ en Vielha e Mijaran
Mès de 1500 persones entre ciclistes, organizacion e periodistes se lòtgen enes otèls deth municipi dempús dera etapa, abantes de repréner era corsa aguest dimèrcles
Es amants deth ciclisme an podut gaudir deth pas deth Tour de França pera Val d’Aran pendent aguest dimars, en transcors dera 16au etapa entre Carcasonne e Bagnères-de-Luchon, qu’a passat per Les, Bossòst e eth Pòrt deth Portilhon. Ua grana notícia entath territòri, qu’a podut tornar a veir as melhors ciclistes internacionaus pes nòstes carretères.
Ath delà, era arribada deth Tour de França supause ua grana notícia entath sector otelèr de Vielha e Mijaran, pr’amor qu’era màger part des equips ciclistes, organizacion e periodistes dera pròva se lòtgen enes otèls deth municipi. En aguest sens, eth pas dera corsa aurà ua repercusion economica d’uns 150.000€ entà Vielha e Mijaran, en tot tier en compde qu’autant es otèls coma eth sector dera restauracion trebalhen a plen rendiment pendent aguesta jornada.
Eth darrèr viatge qu’era ’Grande Boucle’ siguec en territòri aranés siguec en an 2016, quan Vielha acuelhec era gessuda dera 9au etapa d’aquera edicion deth Tour, en ua jornada que finalizèc en Andòrra-Arcalis.
Segontes eth baile de Vielha e Mijaran, Juan Antonio Serrano, “èm fòrça contenti pera arribada, un aute viatge, deth Tour de França per tèrres araneses. Era finalizacion dera etapa d’aguest dimars en Bagnères-de-Luchon mos permet gaudir d’ua grana aucupacion otelèra, e sustot que i age ua nauta repercusion economica entath conjunt deth sector servicis deth municipi”.
Pera sua part, eth còsso d’Espòrts, Alberto López, hig qu”aguesti eveniments de prumèr nivèu internacionau an ua grana importància entà Vielha e Mijaran e eth conjunt dera Val d’Aran, peth gran espectacle qu’aufrissen es ciclistes en etapes de nauta montanha coma era viscuda aguest dimars”.
25/07/2018