Notícies Veir istoric
Era Marcha Nordica contunhe pendent aguest ostiu en Vielha e Mijaran damb es 3 modalitats assolidades ath long dera setmana
A compdar dera estrea dera Healthy Nordic Walking e era Sportive Nordic Walking, era miejana de participaires a pujat considerablament e cada viatge a mès acceptacion enes vesins deth municipi
Damb era bona donada de participaires qu’a era Marcha Nordica en Vielha e Mijaran enquiara, aguest ostiu contunhe en tot auer-i mès gessudes pendent totes es setmanes. A compdar d’aguesta primauera, aguesta modalitat esportiva a un totau de 3 tipes de gessudes: Era Social Nordic Walking (abituau de toti es dissabtes), as que s’an junhut era Healthy Nordic Walking (deluns e dijaus) e era Sportive Nordic Walking (dimars). Era acceptacion d’aguestes naues prepauses entre era gent a estat fòrça positiva, pr’amor que s’a artenhut un aument considerable de participaires. Era miejana se place ath tor de lèu 20 persones per activitat enquiara.
En cada gessuda des grups, que compden damb monitors especializadi, recorren desparièrs endrets de Vielha damb distàncies que van, en foncion dera modalitat, des des 4 enquias 11 quilomètres, apuprètz.
Enes naues modalitats incorporades, eth Vielha Sportive Nordic Walking ei ua modalitat mès exigenta pr’amor que s’an de completar recorruts en menor temps possible (er orari ei entre es 18:00 e es 20:30). Pera sua part, eth Vielha Healthy Nòrdic Walking ei pensat entad aqueri ciutadans damb un estat fisic mès baish o qu’agen de besonh realizar ua activitat fisica moderada. Aguestes gessudes son mès cuertes damb recorruts de 4-5 quilomètres de pòc desnivèu e a un ritme suau.
Segontes eth còsso d’Espòrts de Vielha e Mijaran, Alberto López, “era Marcha Nordica ei ua modalitat esportiva qu’a fòrça exit entre es vesins deth municipi, e per aguest motiu decidirem ampliar era aufèrta de gessudes, en tot adaptar-les as condicions fisiques de cada persona, e que se pòden gaudir pendent lèu tot er an”. Ath delà, López hig “des der ajuntament èm fòrça satisfèts des donades obtengudes, en ua activitat qu’a coma objectius era practica esportiva, potenciar era vida saludabla e es relacions vesiaus”.
Er Ajuntament de Vielha e Mijaran impulsèc hè 3 ans era Marcha Nordica jos eth lèma “Pera tua salut, botja-te”, e des d’alavetz cada an artenh bones donades de participaires enes gessudes programades. Enguan, un viatge assolidades es 3 modalitats, se pòt gaudir d’aguest espòrt pendent diuèrsi dies dera setmana.
Es gessudes dera Marcha Nordica se mantieràn ath long der ostiu e finalizaràn, coma cada an, ena tardor mentre era climatologia ac permete.
26/07/2018