Notícies Veir istoric
Aguest pròplèu dimenge, 29 de junhsèga, se celèbre era 25au edicion dera Corsa Aran Per Sa Lengua
Era Plaça dera Glèisa de Vielha acuelherà es actes dera fin dera hèsta, damb era arribada des terçons, era lectura deth manifèst de Lengua Viua, eth liurament deth Prèmi Lengua Viua e eth concèrt deth grop Nadau
Aguest pròplèu dimenge, 29 de Junhsèga, se celèbre era 25au edicion dera Corsa Aran Per Sa Lengua, era hèsta reivindicativa dera identitat e era lengua aranesa. Aguest eveniment organizat peth collectiu Lengua Viua, compdarà damb es tradicionaus gessudes a pè des des desparièrs parçans dera Val d’Aran e finalizarà en Vielha. Era gessuda de Vielha e Mijaran s’amiarà a tèrme en tot passar eth Pòrt de Vielha damb gessuda liure, damb era posterior amassada en Prat de Teishineret tàs 19:30.
Era Plaça dera Glèisa de Vielha serà, coma de costum, er endret qu’acuelh es actes dera fin d’aguesta hèsta. Ath tor des 20:00, era gent procedenta des terçons, se traparà entà pujar entara plaça amassa damb es claus. Era hèsta contunharà damb era lectura deth manifèst de Lengua Viua, en tot seguir damb eth liurament deth Prèmi Lengua Viua ara persona o entitat que trabalhe ena defensa dera identitat e dera lengua aranesa, e se barrarà er eveniment damb eth tradicionau concèrt deth grop occitan, Nadau.
Segontes eth baile de Vielha e Mijaran, Juan Antonio Serrano, “ei un orgulh que pogam celebrar ja era 25au edicion dera Corsa Aran Per Sa Lengua en territòri, e coma de costum, Vielha mercarà era fin dera hèsta damb es actes institucionaus e ludics premanidi”. Ath delà, Serrano hig que ”mos cau felicitar entre toti per auer hèt d’aguesta hèsta, que comencèc damb pòca gent, un acte reivindicatiu que mos amasse a toti es aranesi e araneses ena defensa dera nòsta identitat”.