Notícies Veir istoric
Vielha acuelh un an mès era gessuda e era arribada deth RodiBook, damb mès de 800 motoristes, qu’aurà ua repercusion economica de 300.000€ en municipi
Er 1 de seteme se celebrarà aguesta pròva non competitiva que trauèsse bona part deth Pirenèu de Catalonha e de França
Aguesta pròplèu dimenjada se celèbre ua naua edicion deth RodiBook, ua pròva non competitiva ena que participaràn mès de 800 motoristes que trauessaràn bona part des carretères deth Pirenèu de Catalonha e de França.
Vielha, coma cada an, aurà un protagonisme clau en RodiBook, pr’amor qu’ei eth lòc a on s’amiarà a tèrme era gessuda e era arribada. Diuendres 31 d’agost aurà lòc eth briefing ena carpa plaçada en parcatge des antigues casèrnes militares, a compdar des 20:30. Dissabte 1 de seteme, es participaires gesseràn des deth parcatge a compdar des 06:00 entà completar lèu 700 kms pes Pirenèus. Era arribada ei programada entre es 20:00 e es 23:00 tanben en parcatge de Vielha.
Eth RodiBook ei un eveniment que comence a èster fòrça mediatic, e qu’ei tanplan important entà Vielha e Mijaran, pr’amor que se demore qu’age ua repercusion economica de 300.000€, en ua dimenjada ena que s’i veirà beneficiat eth conjunt deth sector toristic deth municipi.
Segontes eth baile de Vielha e Mijaran, Juan Antonio Serrano, “èm satisfèts de poder acuélher un an mès eth RodiBook. Un eveniment important entà Vielha, en tot supausar un benefici autant entath sector ostalèr e dera restauracion, coma entàs amants deth motociclisme”. Serrano hig qu’”ei ua escasença unica de poder veir a mès de 800 motocicletes en tot recórrer eth nòste territòri, e de ben segur qu’es pròpris participaires gaudiràn damb era beresa que se traparàn en sòn recorregut”.