Notícies Veir istoric
Vielha e Mijaran bonificarà as veïculs respectuosi damb eth miei ambient
Eth plen der Ajuntament a aprovat era modificacion dera ordenança fiscau damb era que i aurà ua reduccion deth 75% dera taxa as veïculs electrics o ibrids
Er Ajuntament de Vielha e Mijaran bonificarà as veïculs que son respectuosi damb eth miei ambient. En aguest sens, aué s’a aprovat ena session plenària ordinària, era modificacion dera ordenança fiscau sus er impòrt as veïculs de traccion mecanica. A compdar der an que ven, i aurà ua reduccion deth 75% dera quòta a pagar as proprietaris de veïculs electrics o ibrids, atau coma des veïculs bimodals, es impulsadi damb energia solar e es veïculs qu’empleguen biocombustible.
Atau madeish, er Ajuntament se trape en tot acabar d’estudiar era possibilitat de plaçar diuèrsi punts de recarga electrica en municipi entàs veïculs electrics. “Vielha e Mijaran ei un municipi qu’apòste peth respècte ath miei ambient, e per açò, auem aprovat aguesta ordenança que permeterà qu’es veïculs electrics o ibrids agen ua bonificacion”, comente eth baile de Vielha e Mijaran, Juan Antonio Serrano. E hig, que “damb aguesta modificacion, volem promòir era sensibilizacion ciutadana damb aguest ahèr, e en futur que i age emplaçaments sufisents entà poder recargar era electricitat qu’an de besonh aguest tipe de veïculs”.
En plen tanben s’a aprovat era rèsta de taxes municipaus en relacion as installacions e espacis d’usatge publics, atau coma eth modèl de contròl intèrn, de fiscalizacion e intervencion dera gestion economica e financèra.
19/09/2018