Notícies Veir istoric
Fomento a enderrocat era “casilla” de Betlan entà melhorar era seguretat viària dera N-230
Er Ajuntament de Vielha e Mijaran realizèc es gestions avientes aguest ostiu damb eth ministèri dempús dera demana d’inseguretat que reclamauen des de hège fòrça ans es vesins de Betlan e Aubèrt
Aguest deluns, eth Ministerio de Fomento a procedit a tirat en tèrra era istorica “casilla” de Betlan, plaçada ath cant dera N-230 e dera incorporacion ath pòble. Aguesta decision s’a amiat a tèrme entà melhorar era seguretat viària des veïculs que transiten pera N-230 e as qu’empleguen er accès a Betlan.
Aguesta accion a estat possible gràcies ara negociacion qu’a amiat a tèrme er Ajuntament de Vielha e Mijaran, dempús d’auer enviat ua carta en tot demanar que se realizèsse era melhora d’aguest punt viari. Aguesta ei ua reclamacion qu’es vesins de Betlan e Aubèrt an hèt pendent fòrça ans, e hè 3 mesi qu’amièren a tèrme ua demana formau entà qu’aguest emplaçament se melhorèsse, pr’amor que i auie fòrça dificultats de visibilitat entàs veïculs que s’auien d’incorporar ara N-230 des de Betlan.
Segontes eth baile de Vielha e Mijaran, Juan Antonio Serrano, “des der Ajuntament arremassèrem era demana qu’es vesins de Betlan hèren sus era inseguretat viària en crotze de Betlan, e per aguest motiu auem negociat damb Fomento es accions de besonh entà melhorar era circulacion viària”. E hig que “ara calerà cercar era solucion avienta entà assegurar era corrècta incorporacion des veïculs que volguen entrar o gésser de Betlan”.
Era “casilla” siguec bastida per Fomento a principis deth sègle XX entà que i viuessen es trabalhadors deth ministèri, e qu’èren repartides per fòrça endrets d’Espanha.
24/09/2018