Notícies Veir istoric
Eth Departament de Justicia dera Generalitat reconeish ar Ajuntament de Vielha e Mijaran peth sòn trabalh en airau penitenciari
Er Ajuntament manten un convèni en airau penau damb era Generalitat a compdar der an 1999 relatiu as mesures alternatiues as penes privatiues de libertat
Eth Departament de Justícia dera Generalitat de Catalunya a reconeishut eth trabalh qu’amie a tèrme er Ajuntament de Vielha e Mijaran en airau penitenciari. Ua reconeishença sustot pera vasta trajèctoria dera institucion en trabalhs en benefici dera comunitat, e qu’en aguest cas a coma maximala responsabla a Pilar Hervada, secretaria/interventora der Ajuntament.
“Justícia a volut premiar ath consistòri pes prètzhètzs que se desvolòpen en airau dera execucion penau en tot contribuïr a auer ua societat mès justa, mès segura e coesionada”, coma afirme era directora d’Execucion Penau ara Comunitat e de Justicia Juvenila, Pilar Heras.
Er Ajuntament de Vielha e Mijaran collabòre damb era Generalitat de Catalunya en airau penitenciari a compdar der an 1999, quan signèc un convèni a on tanben i participe era Associació Catalana de Municipis i Comarques e era Federació de Municipis de Catalunya, entà fomentar e aplicar es mesures alternatiues as penes privatiues de libertat de tota Catalonha.
Eth convèni preve es bases de collaboracion ena execucion des ordes e mesures judiciaus aplicades as adolescents e joeni, atau coma enes mesures penaus alternatiues imposades ara poblacion adulta en municipi, e enes procèssi de reinsercion que se’n deriven.
En acte de liurament, que se celebrèc eth passat 25 de seteme en pati dera antiga preson Model de Barcelona, pendent es hèstes dera Mercè, i auec un totau de 72 reconeishences a professionaus o entitats der airau penitenciari.
01/10/2018