Notícies Veir istoric
Vielha acuelherà eth 23 d’octobre eth prumèr Job Dating dera província de Lhèida
Er objectiu ei er escambi entre es enterpreses e es trabalhadors dera Val d’Aran e deth sud de França entà fomentar contractacions entara sason d’iuèrn
Eth pròplèu 23 d’octobre, Vielha acuelherà era celebracion d’un Job Dating en Palai d’Espòrts, eth prumèr que se celèbre ena provincia de Lhèida. Aguest eveniment, organizat peth SOC Vielha en collaboracion damb eth Grèmi d’Ostalaria dera Val d’Aran e er Ajuntament de Vielha e Mijaran, preten favorir que i age un escambi entre es enterpreses e trabalhadors dera Val d’Aran e der aute costat dera termièra francesa, entà fomentar un aument des contractacions laboraus de cara ara pròplèu sason d’iuèrn.
Aguest dimars s’a amiat a tèrme era presentacion deth Job Dating en Ajuntament de Vielha e Mijaran, damb era preséncia deth baile de Vielha e Mijaran, Juan Antonio Serrano, era sosdirectora generau d’Ocupacion en Catalonha, Susana Díaz, eth cap deth Servici Territoriau d’Ocupacion de Lhèida, Alt Pirineu e Aran, Oriol Salvia, eth director deth SOC Vielha, Jesús Vergés, eth president deth Grèmi d’Ostalaria dera Val d’Aran, Ambròs Barberà e Michel Montserrat, membre der UMIH de França.
Pendent era celebracion deth Job Dating, i aurà 24 enterpreses qu’aufriràn trabalhs entara sason d’iuèrn en sector dera ostalaria e de torisme de montanha. Ath delà, tanben i son convidadi er INS d’Aran e er Institut d’El Pont de Suert. Toti es interessadi auràn de portar eth sòn Curriculum Vitae, pr’amor que se pòden generar entrevistes de trabalh. Er orari serà de 09:30 a 13:00.
“Aciu ena Val d’Aran, un territòri que viu en gran part deth sector toristic, a de besonh fòrça trabalhadors entàs cinc mesi d’iuèrn. Eth Job Dating de Vielha deth pròplèu 23 d’octobre ei ua grana oportunitat entà qu’es enterpreses e trabalhadors poguen auer ua trobada dirècta e poder escambiar es sòns interèssi laboraus”, comente eth baile de Vielha e Mijaran, Juan Antonio Serrano.