Notícies Veir istoric
Er autobús dera rota circulara “Reiaume der Aneto”que junh Benasque e Luchon tanben compde enguan damb parada en Vielha
Aguesta iniciatiua s’includís laguens deth projècte “Interreg-POCTEFA” entà promòir es tres destinacions
A compdar d’enguan, er autobús que junh es localitats de Benasque e Luchon ena rota circulara “Reiaume der Aneto”, tanben a parada en Vielha. Aguesta accion s’includís laguens deth projècte Interreg-POCTEFA signat pes ajuntaments municipaus des 3 poblacions, entà fomentar era promocion conjunta des diuèrsi territòris.
Era parada d’aguest autobús ei plaçada ena Avenguda Calbetó Barra, en madeish lòc a on abituaument a lòc era parada des autobusi de linha dera Val d’Aran, autant de pujada coma de baishada. Aguest transpòrt compde damb dus servicis ath long deth dia: Ath maitin entàs 10:30 e pera tarde entàs 18:30. Era enterpresa encargada d’aufrir eth servici ei Autocares Pirineos 3000 SLU, e entà poder viatjar en autobús ei de besonh amiar a tèrme era resèrva prèvia en telefòn 669702300, en tot contactar en corrèu electronic: pirineos3000@conectandovalles.com o ena plana web: www.benasquevielhaluchon.com, a on traparatz tanben mès informacion sus aguest servici.
Segontes Maria Vergés, dusau Tinent d’Alcalde de Vielha e Mijaran, “aguesta accion supause un pas mès en projècte de promocion conjunta entre Benasque, Luchon e Vielha e Mijaran, includida en projècte POCTEFA-Reiaume der Aneto, entà promòir conjuntament es diuèrsi territòris”.
Laguens deth projècte tanben se i trapen d’autes iniciatiues coma eth bastiment dera estacion de trail e senderisme en Vielha e Mijaran que serà ua realitat en 2019.