Notícies Veir istoric
Er Ajuntament de Vielha e Mijaran inicie es òbres de melhora en hilat d’aigües deth Carrer Montcorbison de Vielha
S’amie a tèrme era substitucion de fòrça canerades antigues, e tanben s’aparien es trepadèrs deth pròpri carrèr
Er Ajuntament de Vielha e Mijaran a començat es trabalhs de substitucion der hilat d’aigües deth carrèr Montcorbison de Vielha. Aguestes òbres s’amien a tèrme pr’amor que i a diuèrses canerades d’aguest servici que se trapen obsoletes, e ère de besonh cambiar-les. Ath delà, tanben se realizen trabalhs de melhora des trepadèrs ath long deth carrèr, entà facilitar eth pas as ciutadans.
Aguestes òbres èren previstes ena 2au modificiacion deth pressupòst municipau d’enguan, e era partida ei avalorada en 109.069,91€. Es trabalhs s’alongaràn pendent diuèrses setmanes, en tant que s’a començat pera part nauta deth carrèr, e auràn de finalizar ena part baisha, ath cant dera rotonda d’entrada a Vielha.
“Des der Ajuntament volem aufrir eth melhor servici d’aigües as vesins de Vielha, e per açò, deuant dera antiguitat des canerades deth carrèr Montcorbison, trabalham en melhorar aguestes installacions e adaptar-les as tempsi actuaus”, comente eth baile de Vielha e Mijaran, Juan Antonio Serrano. E hig que “era pujada deth canon de sanejament municipau amiada a tèrme per Ajuntament se hèc en gran part entà poder realizar melhores en servici d’aigües, coma era deth carrèr Montcorbison”.
16/10/2018