Notícies Veir istoric
Mès de 300 persones an passat aguest dimars peth Job Dating Vielha
S’an aufrit 250 lòcs de trabalh d’enterpreses dera Val d’Aran e deth sud de França ena prumèra experiéncia d’aguest tipe que s’a amiat a tèrme en Catalonha
Gran èxit d’acuelhuda ena prumèra edicion deth Job Dating que s’a celebrat en Palai d’Espòrts de Vielha pendent aguest dimars e qu’a estat organizat pera oficina deth Servei d’Ocupació de Catalunya (SOC) de Vielha damb era collaboracion deth Grèmi d’Ostalaria dera Val d’Aran, er Ajuntament de Vielha e Mijaran e era Pôle d’Emploi francés. Mès de 300 persones an participat en aguest eveniment qu’auie coma objectiu apropar as enterpreses e as trabalhadors dera Val d’Aran e deth sud de França en tot cercar possibles contractacions laboraus de cara ara pròplèu sason d’iuèrn.
Ua trentia d’enterpreses a participat en aguesta accion en tot presentar lèu 250 lòcs de trabalh entath pròplèu iuèrn. Era participacion dera gent en Job Dating a estat constant pendent tot eth maitin, en tot amiar eth sòn Curriculum Vitae as entrevistes. Segontes comentaue eth responsable dera oficina deth SOC de Vielha, Jesús Vergés, “era responsa dera gent ad aguesta prumèra edicion deth Job Dating Vielha a estat fòrça positiua, pr’amor qu’a vengut fòrça mès gent dera que podiem demorar”.
Ath delà dera gent qu’a participat presenciaument, era organizacion a recebut un totau de 148 Curriculums Vitae via corrèu electronic enquia aué. De manèra qu’era participacion finau en Job Dating Vielha se place en 500 persones interessades apuprètz.
“Entà Vielha e Mijaran, aguesta prumèra edicion deth Job Dating Vielha a estat fòrça satisfactòria. Des der Ajuntament volem arregraïr as organizadors, as enterpreses e ara gent qu’a participat, eth sòn interès e esfòrç entà qu’age estat un gran èxit”, comentaue eth baile de Vielha e Mijaran, Juan Antonio Serrano. E a hijut que “auem estat pionèrs en Catalonha ena celebracion d’un eveniment com aguest en favor de júnher es relacions entre es enterpreses e trabalhadors, e demoram qu’en futur contunhen en aguest camin”.
Entà conéisher era avaloracion finau d’aguest Job Dating, des dera organización amiaràn a tèrme un seguiment enquia que comence era sason d’iuèrn damb es enterpreses entà verificar se, fin finau, s’an cobèrt es lòcs de trabalh aufridi.
Era intencion ei qu’es jornades de Job Dating se poguen amiar a tèrme dus viatges ar an: un entara sason d’iuèrn, e eth dusau de cara ar ostiu. En aguest sens, era pròplèu primauera ei previst que s’amie a tèrme un nau Job Dating.