Notícies Veir istoric
Era Bibliotèca Generau de Vielha celèbre eth sòn 17au aniversari damb un ample programa d’activitats deth 20 ath 24 de noveme
Pendent aguesti dies i aurà club de lectura, presentacion de libres, teatre musicau, liurament des prèmis des concorsi de microrelats e de fotografia, e session de condes
Pendent eth 20 e eth 24 de noveme, era Bibliotèca Generau de Vielha commemòre eth sòn 17au aniversari damb un vast programa d’activitats que serà dubèrt a toti es publics. Un an mès, aguest equipament municipau vò apropar diuèrsi airaus culturaus ara ciutadania.
Dimars 20 de noveme: començaràn es actes damb eth club de lectura. Entàs 17:30, club de lectura juvenila damb eth libre Momo de Michael Ende, e entàs 20:00, club de lectura d’adults damb eth libre Del color de la leche de Nell Leyson.
Dimèrcles 21 de noveme: contunhen es activitats damb era presentacion deth libre El Mokorero de Okavango de Jose Luis Muñoz, a compdar des 20:00.
Dijaus 22 de noveme: entàs 11:45 s’amiarà a tèrme eth teatre debat Desigualtats a cargue de Xavi Demelo. Pera tarde, entàs 17:30 i aurà ua naua session dera activitat “Libres entà créisher” damb Inma Caubet, damb eth libre La aventura de tu cerebro dera autora Mª José Mas. E entàs 19:00, aurà lòc era representacion teatrau e musicau a cargue de Xavi Demelo.
Diuendres 23 de noveme: a compdar des 19:00, aurà lòc er acte de liurament de prèmis des concorsi abilitadi entà commemorar eth 17au aniversari dera Bibliotèca: eth 2au Concors de Fotografia “Eth mèn repopet” e eth 3au Concors de Microrelats. Aguest acte anarà acompanhat pes escòles de musica de Vielha e compdarà damb Esperanceta de Casa Gassia d’Estèrri coma mèstra de ceremònies.
Dissabte 24 de noveme: eth cicle d’activitats finalizarà damb ua session de condes des Pirenèus damb Ostau Comengés e era sua acordion, a compdar des 17:30.
“Un an mès, er Ajuntament de Vielha e Mijaran collabòre estretament damb era Bibliotèca Generau de Vielha entà aufrir un ample programa d’activitats culturaus entà commemorar un nau aniversari d’aguest equipament”, comente era còsso de Cultura de Vielha e Mijaran, Maria Vergés. E hig qu’“en mèn nòm e en de tot er Ajuntament, feliciti ara Bibliotèca e as sòns trabalhadors per mantier viua aguesta installacion pendent tanti ans e que poguen contunhar fòrça ans mès damb aguest espaci qu’ei fòrça important entath municipi”.