Notícies Veir istoric
Er AMPA dera Escòla Garona inaugure eth nau pati dera escòla, amassa damb er Ajuntament de Vielha e Mijaran e era Fundació Obra Social “La Caixa”
Aguest nau espaci compde damb un espaci nau de jòcs e sable, 3 naues taules de tennis taula e dues porteries de fotbòl
Aguest dimèrcles, s’a inaugurat oficiaument eth nau pati dera Escòla Garona. Aguest espaci neishec arraïtz d’ua demana per part dera madeisha escòla hè 11 ans entà melhorar era zòna de jòcs entàs escolars. Pendent es darrèri dus ans, er AMPA a arremassat sòs damb diuèrses activitats, e a artenhut lèu 30.000€ entad aguest nau espaci. D’aute biais, era Fundació Obra Social “La Caixa” tanben a participat ena melhora d’aguest endret damb 8750€.
Aguest nau pati dispause d’ua zòna de jòcs entàs escolars e tanben entà poder jogar dambe th sable. Ath delà, i a 3 taules de tennis taula e 2 porteries de fotbòl.
Eth baile de Vielha e Mijaran, Juan Antonio Serrano, mostraue eth sòn arregraïment as institucions que s’an implicat, pr’amor qu’”ara es escolars dera Escòla Garona an eth pati que meriten dempús de fòrça ans de reivindicacion”.
Pera sua part, era presidenta dera junta der AMPA, Sara Sanchez, comentaue qu’”auem trabalhat fòrça entà arténher qu’eth pati sigue en condicions, pr’amor qu’ère en un estat deficient hè ans, e ara es nòsti alumnes pòden gaudir d’un espaci en bones condicions”.
Fin finau, eth director de zòna der Alt Pirinèu i Aran de CaixaBank, Andrés Ríos, destacaue qu’”èm fòrça satisfèti damb eth resultat d’aguest nau pati. Lèu 500 escolars ja pòden gaudir d’aguest espaci, en ua accion que s’identifique pleament damb es valors dera Fondacion, e per aquerò i auem prenut part”.
Er acte de inauguracion a finalizat damb ua chicolatada entà toti es alumnes dera Escòla Garona qu’an estat presents.
22/11/2018