Notícies Veir istoric
Era delegada deth Govèrn d’Espanha en Catalonha, Teresa Cunillera, a realizat ua visita institucionau ena Val d’Aran
Cunillera s’a amassat en Ajuntament de Vielha e Mijaran damb eth baile municipau, Juan Antonio Serrano e damb era rèsta de bailes dera Val d’Aran
Era delegada deth Govèrn d’Espanha en Catalonha, Teresa Cunillera, a realizat ua visita institucionau pendent aguest deluns ena Val d’Aran, a on s’a amassat damb eth baile de Vielha e Mijaran, Juan Antonio Serrano, e diuèrsi còssos municipaus. Posteriorament, ara amssada s’i an hijut es bailes de Bossòst, Les, Canejan, Naut Aran e dera EMD de Bagergue. Previament, Cunillera a mantengut ua amassada damb eth síndic d’Aran, Carlos Barrera.
Pendent era amassada, s’a parlat principaument dera problematica dera N-230. Serrano li a transmetut a Cunillera era sua preocupacion per estudi de reforma d’aguesta via prepausat peth Ministerio de Fomento der anterior govèrn, en quau se contemplen diuèrses alternatiues qu’aurien un fòrt impacte ambientau, economic e toristic sus eth territòri. En aguest sens, Serrano tanben a volut remercar era problematica sus era circulacion des camions pendent es dimenjades, sustot enes periòdes enes qu’era Val d’Aran recep mès visitaires.
“Auem transmetut ara delegada deth Govèrn era nòsta preocupacion pes grèus impactes qu’aurien es diuèrses alternatiues que mos presentèc er anterior govèrn en estudi de reforma dera N-230. En aguest sens, Cunillera, que coneish d’apròp aguesta problematica, mos aufrís era sua collaboracion entà trabalhar entà trapar era melhor solucion possibla ara principau via d’entrada e gessuda qu’auem ena Val d’Aran”, comente Serrano.
Cunillera a mostrat era intencion de que i age collaboracion e cooperacion entre es diuèrses institucions implicades, entà qu’era gent pogue veir qu’es administracions son pròplèus as ciutadans, en un ahèr tanplan important coma era N-230 e era sua reforma.
Ath delà, pendent era amassada, tanben s’a parlat sus era situacion actuau deth Palai de Gèu de Vielha, a on er Ajuntament de Vielha e Mijaran trabalhe damb er Ajuntament de Barcelona entà arténher ua pista de gèu provisionau entà 2019. Era possibla celebracion des Jòcs Olimpics Pirenèus-Barcelona, poderie favorir qu’es administracions s’impliquessen ena melhora dera installacion.
Pendent era amassada en Ajuntament de Vielha e Mijaran, Cunillera a signat en Libre d’Aunor deth consistòri.
26/11/2018