Notícies Veir istoric
Er Ajuntament de Vielha e Mijaran presente eth Plan d’Igualtat d’Oportunitats entre òmes e hemnes deth municipi
Aguest estrument preten potenciar era igualtat d’oportunitats entre genres en tot dotar-se d’accions concrètes tà assolir un modèl just de relacions sociaus entre hemnes e òmes
Aguest diuendres er Ajuntament de Vielha e Mijaran a presentat eth Plan d’Igualtat d’Oportunitats entre òmes e hemnes deth municipi de Vielha e Mijaran, en un acte qu’a agut lòc ena Sala d’Actes deth consistòri.
En Plan s’an dessenhat un conjunt d’accions adreçades, d’un costat, a véncer es diuèrses dimensions dera discriminacion de genre: estructuraus derivades dera division sexuau (espaci e trabalh) e es culturaus, derivades dera impausicion de ròls e estereotips. E der aute costat, accions determinades a bastir un modèl reau d’igualtat a compdar de generar prepauses qu’agen possibilitats efectives de produsir cambis ena realitat materiau e simbolica. Aguest Plan preten èster, donc, un estrument municipau qu’a coma objectiu establir accions concrètes que poguen evitar es desigualtats per motius de genre en municipi de Vielha e Mijaran.
Atau donc, aguestes accions comprenen, entre d’auti, trabalhs de formacion (talhèrs, corsi, conferéncies…) atau coma estratègies qu’incidisen directament enes activitats quotidiànes dera poblacion entà arténher ua màger conscienciacion.
Era sua redaccion a estat elaborada per ua empresa extèrna, especializada en aguesti ahèrs e que coincidís enes qüestions de genre enes lòcs ruraus e de montanha.
“Era elaboracion d’aguest Plan a estat un compromís der Ajuntament de Vielha e Mijaran conscients coma èm de qu’era igualtat de drets entre es persones ei un des elements fonamentaus deth desvolopament d’ua societat” manifèste era dusau tinent d’alcalde e còsso d’accion sociau, Maria Vergés. Atau madeish, hig que “era educacion, era conscienciacion e era formacion en matèria de genre son claus entà trabalhar e arténher aquera igualtat reau e, pr’amor d’açò, er Ajuntament de Vielha e Mijaran presente aguest Plan d’Igualtat d’Oportunitats entath periòde 2018-2022, qu’establís es estratègies e accions concrètes qu’ajuden a arténher aguesti objectius en nòste municipi” .
Pendent era redaccion deth plan s’a compdat damb era informacion balhada per part de diuèrsi estaments educatius, des còssi de seguretat e deth Servici Integrau d’Atencion ara Hemna deth Conselh Generau, a qui era tinent d’alcalde a arregraït era collaboracion.
14/12/2018