Notícies Veir istoric
Er Ajuntament de Vielha e Mijaran inaugure eth nau centre de joenessa “Antara”
Aguest equipament s’a bastit en antic aucidèr de Vielha entà qu’eth conjunt de joeni deth municipi age un espaci a on amassar-se pendent es dimenjades e damb recorsi especifics entà da eri
A compdar d’aué, es joeni de Vielha e Mijaran compden damb un nau espaci a on poder amassar-se e amiar a tèrme desparières activitats qu’agen de besonh: Eth centre de joenessa “Antara”. Aguesta tarde s’a inaugurat aguest equipament qu’ei plaçat en antic aucidèr de Vielha e qu’en sòn bastiment a compdat damb era collaboracion de La Caixa, qu’aportèc 30.000€ en convèni signat damb eth consistòri entà ajudar enes òbres e eth mobiliari dera installacion.
Aguest centre dispause d’un dinamizador que favorirà eth corrècte foncionament der espaci, e fomentarà era programacion d’activitats dirigides as diuèrses franges d’edats des joeni que l’empleguen. En aguest sens, eth locau compde damb connexion a fibra optica damb 300Mb e WiFi, ordinadors, jòcs, taules e prestatges damb revistes de diuèrses tematiques entàs joeni.
Pendent aguest Nadau, aguest equipament demorarà dubèrt de 17:00 a 20:30 dera tarde (a excepcion des dies hèstius e vigílies, que demorarà barrat). Er objectiu ei qu’es joeni agen un espaci damb recorsi especifics entà da eri, en tot potenciar eth sòn desvolopament personau e innovador, fomentar abituds saludables, de conviuença e era sua integracion ena societat.
“Èm satisfèts de poder daurir aguest espaci tanplan de besonh entara joenessa de Vielha e Mijaran, pr’amor que pensam qu’aguest sector dera poblacion deth municipi merite un endret com aguest, a on es joeni siguen es protagonistes. A despièch de que nosati lis aufrim er espaci fisic, volem que siguen es pròpris joeni qui s’ac hèsquen sòn e decidisquen quines activitats s’i pòden amiar a tèrme”, comente eth còsso de Joenessa, Alberto López.
Pera sua part, eth baile municipau, Juan Antonio Serrano, reconeish qu’”er esfòrç que s’a amiat a tèrme entà daurir aguest centre a estat important, mès èm contenti per auer podut complir damb ua de promeses que mos auiem mercat en programa electorau de 2015”.
Aguest centre va dirigit, sustot, as joeni qu’an entre 10 e 25 ans, que supause eth 20% dera poblacion de Vielha e Mijaran. S’i pòden adreçar autant es joeni a nivèu individuau, coma es diuèrsi collectius qu’i a. Er orari deth centre se mantierà vigent cada dimenjada, de diuendres a dimenge. Totun, se poderie estudiar era possibilitat de daurir-lo en d’auti dies entà amiar a tèrme activitats concrètes.
22/12/2018