Notícies Veir istoric
Vielha e Mijaran finalize era epòca de Nadau damb ua grana afluéncia de visitaires
Maugrat qu’era quantitat de nhèu en territòri ère fòrça justa, era grana varietat d’activitats organizades per Ajuntament e eth bon trabalh deth conjunt deth sector servicis, a favorit un Nadau satisfasent
Eth balanç finau realizat en Vielha e Mijaran dempús dera finalizacion deth periòde de Nadau ei positiu. Pendent es 15 dies qu’a durat aguesta epòca hestiva, era preséncia de visitaires en municipi a estat fòrça nauta. Maugrat qu’en conjunt deth territòri era preséncia de nhèu ère fòrça justa, era ampla varietat d’activitats dirigides a tota sòrta de publics e er excellent trabalh amiat a tèrme peth conjunt deth sector servicis, a permetut barrar eth Nadau damb ua avaloracion immilhorabla.
Ath long d’aguestes dates
soslinhades, es activitats organizades per Ajuntament de Vielha e
Mijaran an estat fòrça e fòrça variades. Es mès petiti an pogut
gaudir de multiples opcions. Eth dia 23 de deseme inaugurèren eth
Nadau damb era “Tronca
de Nadau” damb ua
grana assisténcia de mainatges e mainades. Atau madeish, poderen
gaudir d’ua naua edicion deth Parc Infantil en Palai d’Espòrts, en
tot disposar es dies 22 de deseme e 6 de gèr d’entrada gratuïta per
gentilesa der Ajuntament de Vielha e Mijaran. E, en tot coïncidir
damb era preséncia de Reis
d’Orient,
eth 3 de gèr ena Plaça dera Glèisa de Vielha, es mès petiti
liurèren era carta as patges
e, eth 5, aumpliren es carrèrs deth cap-lòc aranés entà arrecéber
a Ses Magestats
pendent era Cavaucada.
Ath delà, es installacions municipaus tanben acuelheren
desparières activitats, coma
era que s’amièc a tèrme en
Palai de Gèu titolada
“Uluburun:
un naufragi
ena piscina”, que barrejaue era arqueologia
damb eth mon aquatic, en tot convertir as mès petiti en arqueològs
per un dia. Era sala Era
Audiovisuau de Vielha
acuelhec era session de cinèma infantil gratuïta
deth 27 de deseme damb era projeccion de “El
museo de las maravillas” e
era dobla session entà visualizar eth documentau “Por
qué hacemos esto?” que
barrege er aupinisme, era
escalada e er esquí. E, era Sala d’Exposicions de Vielha acuelhec
enquiath 6 de gèr era exposicion “Atau
qu’ère, atau qu’ei”,
dera Fondacion
Musèu Etnologic dera Val d’Aran,
damb un totau de 132 fotografies ancianes e actuaus, en tot comparar
era evolucion deth païsatge e es pòbles dera Val
d’Aran ath long des
dus darrèri sègles.
D’auta banda, es activitats culturaus tanben acuelheren ua bona afluéncia de gent, damb es concèrts d’organ eth 28 de deseme e deth Romanic Musicau eth 3 de gèr ena Glèisa Sant Miquèu de Vielha.
Tanben cau destacar era nauta
participacion de gent en ua naua edicion dera hèsta de
Cap d’An ena Plaça dera
Glèisa de Vielha, gràcies
ar Ajuntament de Vielha e Mijaran, Vardon
Kennett e Gum FM. Ua
hèsta que des des 18:00 ores deth dia 31 de deseme, enquias 01:00
deth dia 1 de gèr, siguec acompanhada de fòrça hèsta e diversion,
e pendent es campanades
se podec brindar damb cava e minjar es tradicionaus arradims entà
dar era benvenguda ath 2019.
Ath delà, deuant era manca
de nhèu, se poderen realizar tota sòrta d’activitats ar aire liure
en conjuncion damb era natura, coma senderisme o passejades en
biciclèta pes pòbles e montanhes deth municipi.
Cau
destacar eth gran trabalh
qu’a realizat eth conjunt deth sector servicis pendent aguesta epòca
entà acuélher ath torisme qu’i
auie en municipi. Atau,
autant
es comèrci, coma eth sector otelèr e de restauracion trabalhèren
intensament, en tot demostrar eth gran potenciau qu’a Vielha e
Mijaran coma referent toristic de montanha. Un
exit que ven acompanhat pera
bona disponibilitat de parcatge que beneficie era possibilitat
d’acuélher un gran nombre de veïculs.
“Eth
balanç que podem hèr de Nadau en Vielha e Mijaran ei satisfasent e,
en aguest sens, m’agradarie arregraïr a toti es trabalhadors deth
sector servicis deth municipi peth gran trabalh realizat e tanben a
Baqueira-Beret
per auer amiat a tèrme un enòrme esfòrç entà disposar dera
estacion d’esquí enes melhores condicions possibles, dempús d’ua
meteorologia
advèrsa e ua quantitat de nhèu pro justa en aguesta epòca der an”,
comente eth baile de Vielha e Mijaran, Juan Antonio Serrano, qu’ahig
que “maugrat açò
credem que comence a èster urgent ua planificacion toristica a hons
entà que, en epòques coma aguesta a on i a manca
de nhèu e eth sector se pòt ressentir, Aran
aufrisque activitats e aufèrta variada entà sajar de
palliar es efèctes
d’un iuèrn damb fauta de nhèu".