Notícies Veir istoric
Era coordinadora de Joenessa de Lleida, Esperança Casas, a visitat eth nau centre de joenessa Antara de Vielha e Mijaran
Pendent era visita, Casas a assegurat era volentat dera Generalitat de Catalunya de collaborar en desvolopament d’aguest nau espaci, que cre qu’ei de besonh entara joenessa locau
Pendent era jornada d’aguest dimèrcles, un equip dera Coordinacion Territoriau de Joenessa de Lleida a visitat eth nau centre de joenessa Antara de Vielha e Mijaran. Aguest equip, entestat pera sua coordinadora, Esperança Casas, a podut conéisher de prumèra man eth locau damb toti es servicis qu’aufrís as joeni deth municipi. Ena amassada i an estat presents eth baile de Vielha e Mijaran, Juan Antonio Serrano, eth còsso de joenessa, Alberto López, conselhèra de benéster, Anna Diaz e era tecnica compartida de joenessa, Estefania Revilla.
Era coordinadora territoriau de joenessa de Lleida, Esperança Casas, a felicitat ar Ajuntament peth bastiment d’aguest centre, “pr’amor qu’ei eth prumèr que s’a daurit ena Val d’Aran, a on ère de besonh un espaci d’aguestes caracteristiques entara joenessa”. Ath delà, Casas a assegurat “era volentat dera Generalitat de Catalunya de collaborar enes pròplèus ans damb Antara, e coordinar entre ambdues administracions totes es activitats que siguen de besonh entàs joeni”.
Pera sua part, eth còsso de joenessa, Alberto López, a volut “arregraïr ara Generalitat era sua visita e era sua volentat de trabalhar amassa entà desvolopar aguest centre”. E hig que “ena Val d’Aran ei de besonh que s’amien a tèrme politiques sociaus dirigides as joeni. Des der Ajuntament auem estat pionèrs en bastiment d’aguest centre en territòri, e contunharam trebalhant en tot pensar en futur dera nòsta joenessa”.
Antara dauric es sues pòrtes eth passat 22 de deseme. Pendent aguestes setmanes, ja i an passat mès de 400 usatgèrs, en tot auer-i ua mejana ath tor de 30-40 joeni per dia, en orari de dubertura deth centre (de diuendres a dimenge entre es 17o e es 20o). “Era sason de Nadau a estat un exit absolut, e demoram, qu’a mesura qu’era gent vage coneishent eth centre, contunhe aumentant era donada d’usatgèrs. D’aguesta manèra, es joeni s’ac haràn sòn e l’adaptaràn damb es activitats e besonhs que considèren”, precise López.