Notícies Veir istoric
Vielha e Mijaran cree eth Conselh dera Vila
Vielha e Mijaran a aprovat aué en session plenària era creacion d’aguest òrgan de participacion e consulta ciutadana que preten establir ua vinculacion dirècta entre era administracion e era ciutadania
Pendent era session ordinària deth Plen der Ajuntament de Vielha e Mijaran d’aguest dijaus s’a aprovat per unanimitat era creacion deth Conselh dera Vila coma un òrgan de participacion e de consulta ciutadana.
En darrèr plen de 2018 s’aprovèc era modificacion deth Reglament de Participacion Ciutadana, a on se fixaue tanben eth reglament de foncionament d’aguest òrgan.
Eth Conselh dera Vila a coma objectiu fomentar eth debat sus es qüestions mès relheuants deth municipi a trauès d’un òrgan democratic de consulta damb era participacion de representants dera societat civila municipau. Entre es sues foncions i son debàter e prebotjar estudis e prepauses estrategiques d’interés entath municipi de Vielha e Mijaran, atau coma informar e recéber informacion de caractèr municipau. Serà conformat per ua representacion des diuèrsi sectors sociaus, culturaus e economics deth municipi designadi peth baile, e per un maxim de 8 mimbres de manèra individuau que demanen formar-ne part. Aguest Conselh s’amassarà periodicament, en tot èster presidit peth baile municipau.
“Eth Conselh dera Vila preten èster un organ assessor, damb caractèr consultatiu, que servisque entà establir ua vinculacion dirècta entre er Ajuntament e era ciutadania, entà parlar des ahèrs que preocupen as vesins e vesies deth municipi”, comente era 2au tinent d’alcalde e còsso d’accion sociau, Maria Vergés, e hig que “ère un des objectius de legislatura e damb eth Conselh dera Vila volem potenciar era participacion ciutadana en Vielha e Mijaran e apregondir en compromís entre era ciutadania e er Ajuntament entà possar eth desvolopament deth nòste municipi”.
Per un aute costat, eth Plen tanben a aprovat iniciaument eth Plan d’Igualtat d’Oportunitats entre hemnes e òmes der Ajuntament de Vielha e Mijaran 2018-2022. Aguest plan, qu’establís un seguit d’estrategies e accions concrètes, ei un esturment entà potenciar e conscienciar sus era igualtat de genre en municipi.
“En plen sègle XXI, e en un moment a on eth debat sus era igualtat entre genres ei en carrèr, er Ajuntament de Vielha e Mijaran pren part, en tot fomentar damb aguest plan aguesta igualtat entre hemnes e òmes coma un des elements fonamentaus deth desvolopament dera societat”, precise Vergés e hig que “era educacion, era conscienciacion e era formacion en matèria de genre son claus entà trabalhar e arténher aquera igualtat reau e pr’amor d’açò er Ajuntament de Vielha e Mijaran presente aguest Plan d’Igualtat d’Oportunitats entath periòde 2018-2022, qu’establís es estratègies e accions concrètes qu’ajuden a arténher aguesti objectius en nòste municipi”.
17/01/2019