Notícies Veir istoric
Es EMDs de Vielha e Mijaran hè mès d’un an qu’an implementat era administracion electronica
Es pedanies de Vielha e Mijaran an estat pionères en emplec d’aguest sistèma ena Val d’Aran
Eth conjunt de pòbles que hèn part deth municipi de Vielha e Mijaran hè un an qu’an en foncionament era administracion electronica, a trauès dera quau era ciutadania pòt accedir ara informacion e as servicis e tramits electronics der Ajuntament de Vielha e Mijaran e de cadua des EMDs deth municipi.
Aguesta normalizacion digitau se produsís entà balhar compliment ara Lei 39/2015, deth Procediment Administratiu Comun des Administracions Publiques e era Lei 40/2015, deth Regim Juridic deth Sector Public, en matèria d’actuacion e foncionament deth sector public per mieis electronics, en vigor a compdar de 2016.
Er Ajuntament de Vielha e Mijaran a contractat un provedidor public (esPublico), qu’ei un estrument a compdar deth quau dispause dera sedença electronica, eth gestor d’expedients, eth tablèu d’anoncis e eth portau de transparéncia entath conjunt deth municipi. En aguest sens, ena plana web oficiau der Ajuntament (www.vielha-mijaran.org) s’i trape er accès ara sedença electronica autant deth consistòri, coma des 7 EMDs municipaus, pr’amor que cadua supause ua figura juridica pròpria. Per tant, se pòden amiar a tèrme a trauès d’aguesta plana, quinsevolha notificacion o gestion administrativa des diuèrsi pòbles de Vielha e Mijaran.
“Vielha e Mijaran ei ath dia en çò que supause ara adaptacion electronica dera administracion publica. Hè un an qu’autant eth consistòri coma es EMDs dispausen d’aguest servici en foncionament, entà aufrir as sòns ciutadans era possibilitat d’amiar a tèrme quinsevolha gestion de manèra digitau”, comente eth còsso de Naues Tecnologies de Vielha e Mijaran, Alberto López. E hig que “aguesta digitalizacion dera administracion publica ei fòrça important en ua societat qu’auance cap ara plea informatizacion dera gestion publica, en tot èster un servici rapid e que foncione es 24 ores deth dia e es 365 dies der an”.
Enguan, des der Ajuntament de Vielha e Mijaran s’inicièc ua campanha entà ajudar ara ciutadania ena implementacion deth certificat digitau, en tot melhorar e agilizar es tramits administratiu dera ciutadania damb er Ajuntament.
Aguesta digitalizacion auance damb er objectiu de qu’en futur i age un registre unic, de manèra que se pogue hèr quinsevolh tipe de gestion des administracions des d’Internet. En aguest sens, quinsevolha administracion aurà de poder hèr gestions administratives que siguen corresponentes a d’autes administracions publiques.
Es URLs oficiaus entà accedir as sedences electroniques de cadua des EMDs son es següentes:
- EMD d’Arròs e Vila: http://seuarrosevila.vielha-mijaran.org
- EMD d’Aubèrt: http://seuaubertebetlan.vielha-mijaran.org
- EMD de Betren: http://seubetren.vielha-mijaran.org
- EMD de Casau: http://seucasau.vielha-mijaran.org
- EMD d’Escunhau e Casarilh: http://seuescunhauecasarilh.vielha-mijaran.org
- EMD de Gausac: http://seugausac.vielha-mijaran.org
- EMD de Vilac: http://seuvilac.vielha-mijaran.org