Notícies Veir istoric
Er Ajuntament de Vielha e Mijaran barre er exercici 2018 damb un superavit de 677.129,34€ e sense aumentar es impòsti
Damb eth superavit que s’a artenhut eth govèrn municipau poirà amiar a tèrme en 2019 diuèrses accions financerament sostenibles
Er Ajuntament de Vielha e Mijaran a barrat es compdes der an 2018 damb un superavit finau de 677.129,34€. Ua bona notícia qu’assolide era bona gestion economica que s’amie a tèrme en consistòri.
Aguesta donada permeterà qu’en 2019 er Ajuntament pogue amiar a tèrme diuèrses accions financerament sostenibles entà melhorar er estat deth conjunt deth municipi. Ath delà, Vielha e Mijaran contunhe en tot mantier-se damb deute zèro, de manèra qu’eth consistòri seguís en tot auer es compdes totaument sanejadi.
Tanben cau remercar qu’aguest superavit s’a artenhut sense auer aumentat es impòsti as vesins e vesies deth municipi. “Èm fòrça contenti peth resultat economic des compdes der Ajuntament de 2018, pr’amor que confirme, un an mès, era bona gestion que s’amie a tèrme en Ajuntament de Vielha e Mijaran”, comente eth baile municipau, Juan Antonio Serrano. “Auem de tier en compde qu’aguest superavit permeterà que pogam contunhar en tot amiar a tèrme mès accions de govèrn entà melhorar eth conjunt deth municipi, e ac auem artenhut en tot congelar es impòsti as nòsti ciutadans. De manèra que melhore era economia municipau, sense aumentar era carga fiscau as nòsti vesins e vesies”.