Notícies Veir istoric
Aguest dissabte comence eth cicle de gessudes de Marcha Nordica de 2019 en Vielha e Mijaran
En 2018 i auec un aument deth 50% ena participacion, en tot passar d’ua a tres tipes de gessudes ath long dera setmana
Eth grup de Marcha Nordica de Vielha e Mijaran se met en marcha a compdar d’aguest dissabte 16 de hereuèr. Eth calendari de gessudes fixes que s’a establit enquiara, compren er iuèrn e era primauera, en tot acabar eth pròplèu 29 de junh ara demora des gessudes d’ostiu.
Era bona dinamica de participacion que s’a artenhut pendent es ans qu’ei en foncionament aguest activitat esportiua, supausèc era creacion en 2018 d’un totau de 3 gessudes: Era qu’ère existenta en 2016 e 2017, que passe a dider-se Vielha Social Nordic Walking, e dus naui productes: Vielha Healthy Nordic Walking e Vielha Sportive Nordic Walking.
Era “Social”, s’amie a tèrme pendent toti es dissabtes de 09:30 a 13:30, damb era que se preten compartir, gaudir d’ua madeisha activitat, en tot conéisher gent naua mentre se practique era activitat fisica. Era “Healthy”, ei dirigida a gent sedentària o en baisha forma, que se vòlen iniciar ena activitat fisica, e qu’es mètges les ac an aconselhat per presentar factors de risc. Es gessudes son dimars e dijaus de 18:00 a 20:00. E, era “Sportive”, includís a toti aqueri que vòlen hèr trabalh fisic, damb fòrça ritme, en tot pujar es pulsacions e sudar. Er orari ei de 18:00 a 21:00 es deluns e diuendres.
Segontes es donades de 2018, era participacion ena practica dera Marcha Nordica a aumentat de manèra considerabla, en tot confirmar era melhora dera tendéncia de participacion d’aguesta activitat en municipi. Concretament, era participacion a aumentat en un 50% respècte as chifres enregistrades en an 2017. Aguest exit se deu, en bona part, ara implementacion d’ua màger aufèrta de Marcha Nordica, en tot establir un calendari mès complet de gessudes.
Era activitat dera Marcha Nordica ei gratuïta, e es lòc de trobada entà començar es activitats ei era Plaça dera Glèisa de Vielha. Ath delà, existís un grup de WhatsApp ena qu’es participaires s’i pòden híger entà poder conéisher mès informacion sus es gessudes e interactuar damb era rèsta de membres.
“Eth programa de gessudes de Marcha Nordica qu’encetèrem des der Ajuntament de Vielha e Mijaran en 2016, cada an mòstre melhores estadistiques de participacion”, comente eth còsso d’Espòrts, Alberto López. E hig que “en tot veir era bona acuelhuda qu’a agut ena gent, en 2018 decidírem aumentar d’ua a tres es tipes de gessudes setmanaus, entà corbir es besonhs des desparières sectors dera poblacion. Es resultats mos confirmen er aument constant de participacion, e que cada viatge i a mès gent que demane prener-ne part”.
Es gessudes de Marcha Nordica comencèren en junh de 2016, mès en 2017 e 2018 eth cicle de gessudes s’amièren a tèrme pendent tot er an e, en 2019, aguesta activitat fisica contunharà, en tot aufrir fòrça mès accions pendent cada setmana.
15/02/2019