Notícies Veir istoric
Vielha e Mijaran recupère era pista de gèu
Er Ajuntament de Vielha e Mijaran artenh signar damb er Ajuntament de Barcelona un conveni entà tornar a gaudir dera pista de gèu
Er Ajuntament de Vielha e Mijaran a signat damb er Ajuntament de Barcelona eth convèni, peth quau Vielha e Mijaran dispausarà aguest madeish iuèrn d’ua pista de gèu mobila provisionau en Palai de Gèu de Vielha enquia 2022.
Aguesta notícia permet qu’es usatgèrs d’aguest equipament municipau poguen tornar a emplegar era pista de gèu dempús de diuèrsi mesi barrada per ua grèu pana en sistèma de refrigeracion. En mes de mai s’espatlèc era pista, e er Ajuntament comencèc a trabalhar damb tecnicians privats e dera Generalitat de Catalunya entà préner era decision avienta. Toti concludiren que non se podie apariar.
Des d’alavetz, er Ajuntament comencèc a amiar a tèrme es gestions entà poder auer era maximala collaboracion institucionau possibla entà daurir un aute viatge era pista de gèu. Pendent aguest temps a mantengut negociacions damb eth pròpri Ajuntament de Barcelona, tanben damb era Secretaria de l’Esport de Catalunya, qui pagarà eth transpòrt e eth sòn montatge, e damb era Secretaria de Estado para el Deporte, Mª José Rienda. Fin finau, er Ajuntament de Vielha e Mijaran sonque aurà de pagar eth loguèr dera pista ath sòn omonim de Barcelona.
Ath delà, cau rebrembar que gràcies ath trabalh deth diputat provinciau Francés Boya, era Diputació de Lleida serà era prumèra administracion publica que se compromet a ajudar ar Ajuntament de Vielha e Mijaran en mantenement deth Palai de Gèu damb ua collaboracion economica annau de 100.000€.
“Des der Ajuntament auem trabalhat intensament pendent nau mesi entà poder daurir un aute viatge era pista de gèu, e èm satisfèti de poder anonciar qu’ac auem artenhut”, comente eth baile de Vielha e Mijaran Juan Antonio Serrano. E hig que “en tot aguest temps, eth consistòri a actuat damb prudéncia e damb sens comun, en tot pensar ena sostenibilitat economica e eth futur dera installacion, sense incrementar era sua despena, en benefici des sòns usatgèrs e des vesins de Vielha e Mijaran”.
“En nòm deth govèrn municipau, voi arregraïr as diuèrses federacions de gèu, autant era catalana coma era espanhòla, as clubs e as familhes peth sòn esfòrç e pera sua paciéncia pendent tot aguest temps. Sabem que non a estat ua epòca facila mès, a compdar d’ara, poderam recuperar era normalitat n’aguest equipament”, concludís Serrano.