Notícies Veir istoric
Vielha e Mijaran constituís eth Conselh dera Vila
Ei eth maxim òrgan consultiu e de participacion ciutadana municipau, e compde damb era representacion de desparièrs sectors dera societat entà parlar sus es ahèrs que mès preocupen as vesins e vesies
Pendent era jornada d’aguest deluns, eth municipi de Vielha e Mijaran a celebrat era prumèra amassada oficiau deth Conselh dera Vila, qu’ei eth maxim òrgan de participacion ciutadana, e que preten establir ua vinculacion dirècta entre era administracion e es vesins e vesies deth municipi.
En aguest sens, ena amassada i a agut era preséncia d’ua representacion fòrça important dera societat entà parlar d’aqueri ahèrs que mès preocupen ara ciutadania deth municipi. Eth Conselh dera Vila a previst amassar-se periodicament en tot èster presidit peth baile municipau, e qu’ei conformat per ua representacion des diuèrsi sectors sociaus, culturaus e economics deth municipi designadi peth baile, e per un maxim de 8 mimbres de manèra individuau que demanen formar-ne part.
Eth Conselh dera Vila a coma objectiu fomentar eth debat sus es qüestions mès relheuants deth municipi a trauès d’un òrgan democratic de consulta damb era participacion de representants dera societat civila municipau. Entre es sues foncions i son debàter e prebotjar estudis e prepauses estrategiques d’interés entath municipi de Vielha e Mijaran, atau coma informar e recéber informacion de caractèr municipau.
“Èm fòrça satisfèts d’auer podut constituir formaument eth Conselh dera Vila, qu’ei un des compromisi electoraus qu’auie establit er actuau equip de govèrn municipau”, comente eth baile de Vielha e Mijaran, Juan Antonio Serrano.
Pera sua part, era 2au tinent d’alcalde, Maria Vergés, afirme qu“ei fòrça important era implicacion dera gent, pr’amor que damb aguestes amassades establim un pònt dirècte entre era administracion e es nòsti vesins e vesies, en tot escotar çò que lis preocupen, e en tot potenciar era participacion ciutadana en Vielha e Mijaran e apregondir en compromís entre era ciutadania e er Ajuntament entà possar eth desvolopament deth nòste municipi”.