Notícies Veir istoric
Er 1 de març se daurís eth periòde de preinscripcions d’alumnes dera Escòla Mairau “Era Cunhèra” entath cors 2019/20
De P0 (6 mesi a 1 an) i aurà 8 places, de P1 (d’1 a 2 ans) i aurà 26 places e en P2 (de 2 a 3 ans) i aurà 34 places
Aguest pròplèu diuendres 1 de març comence eth periòde entà qu’es pairs e mairs poguen inscríuer as sòns hilhs/es ena escòla mairau “Era Cunhèra” de Vielha entath cors 2019/20. Aguest periòde s’esten enquiath pròplèu 31 de mai.
Entad aguest nau cors escolar i aurà un totau de 68 places que seràn corbides pes alumnes dera següenta manèra: en P0 i aurà un totau de 8 places de naua inscripcion, en P1 i aurà 26 places (Totun, 8 places seràn corbides automaticament pes alumnes qu’enguan corsen P0, per tant i aurà 18 places naues) e en P2 i aurà un totau de 34 places (I aurà 24 places qu’automaticament seràn aucupades pes alumnes qu’enguan corsen P1, de manèra que i aurà sonque 10 places de naua inscripcion).
Un viatge finalizat eth periòde d’inscripcion, er 11 de junh se publicarà era lista damb era puntuacion provisionau. Deth 12 ath 14 de junh se daurirà un periòde entà presentar quinsevolh tipe de reclamacion. Eth 17 de junh se publicarà era lista de sollicituds damb era puntuacion definitiva des alumnes admetudi e, s’ei de besonh, dera lista de demora. Eth 18 de junh se celebrarie eth tiratge entà ordenar es sollicituds en cas d’empat ena Sala de Plens der Ajuntament de Vielha e Mijaran e, fin finau, deth 19 ath 28 de junh se daurirà eth periòde de matriculacion.
En cors actuau, 2018/19, era escòla mairau “Era Cunhèra” dispause de 5 linhes dubèrtes: en P0 i a ua aula damb 8 alumnes, en P1 i a dues aules damb 12 alumnes en cadua, e en P2 dues aules damb 17 alumnes en cadua.
“Era escòla mairau “Era Cunhèra” de Vielha ei ua des installacions municipaus mès importantes qu’auem en municipi e pendent er actuau cors escolar a eth 100% des places aucupades per alumnes”, comente era còsso d’Ensenhament, Maria Vergés, que hig que “tot e qu’era Generalitat eliminèc en 2014 es ajudes que balhaue as ajuntaments tàs escòles mairaus (ajuda qu’ara balhe era Deputacion, tot e que redusida ara mitat), auem hèt un gran esfòrç entà qu’eth servici, tot e non èster obligatòri, se pogue mantier damb era qualitat de besonh”. Atau madeish, Vergés a arregraït “eth trabalh de tot eth personau dera Escòla que hè possible que se seguisque desvolopant un servici basic tath nòste municipi”.