Notícies Veir istoric
Vielha e Mijaran acuelherà ara màger part des participaires dera Copa deth Mon d’Snowboard Cross qu’a lòc er 1 e 2 de març en Baqueira-Beret
Eth sector otelèr deth municipi trabalharà a plen rendiment pendent era disputa dera competicion, e era Race Office serà plaçada en Vielha
Aguesta pròplèu dimenjada der 1 e 2 de març, era Val d’Aran serà er scenari dera celebracion d’ua competicion esportiva de naut nivèu internacionau, coma ei era celebracion dera Copa deth Mon d’Snowboard Cross (SBX), qu’aurà lòc en circuit dessenhat en parçan de Blanhiblar ena estacion de Baqueira-Beret.
Pendent aguesti dies, es melhors corredors deth mon d’aguesta especialitat seràn presents ena competicion FIS, en çò que supause un eveniment important entà Vielha e Mijaran, pr’amor qu’era màger part des esportistes e organizadors se lotjaràn enes otèls deth municipi, e ath delà, era Race Office serà plaçada en Otèl Tryp Vielha-Baqueira deth cap-lòc deth territòri.
Era repercusion economica e mediatica que se demore damb aguesta competicion ei fòrça important. Cau rebrembar que Baqueira-Beret ja acuelhec aguesta madeisha competicion en an 2016, a on mès de 3000 persones presencièren en dirècte es desparières fases dera competicion. Per tant, ei previst qu’era donada d’assistents enguan sigue fòrça semblanta, en tot supausar un benefici economic entath conjunt deth sector toristic.
“Entà Vielha e Mijaran aguesta competicion supause que pendent aguesta dimenjada, ath delà d’auer ara elèit deth mon deth snowboard en Baqueira-Beret, eth sector otelèr foncionarà a bon ritme, pr’amor que bona part d’aguesti esportistes seràn lotjadi enes otèls deth municipi, en benefici deth sector toristic en generau”, comente eth baile de Vielha e Mijaran, Juan Antonio Serrano.
“Demoram que milers de persones siguen pendent aguesti dies en tot presenciar era pròva, de manèra qu’era repercusion economica que se demore ei fòrça importanta, en ua dimenjada ena que i a se demore fòrça gent, pr’amor dera celebracion des hèstes de Magràs en Espanha e França. Aguest eveniment mos posse entà contunhar en tot assolidar-mos coma destinacion toristica de montanha e plaçar eth nòste municipi en mapa internacionau”, hig Serrano.
27/02/2019