Notícies Veir istoric
Er Ajuntament de Vielha e Mijaran finalize era redaccion deth Plan Locau de Joenessa
Eth plan se trape en periòde d’exposicion ath public pendent 15 dies entà qu’es ciutadans poguen presentar quinsevolh suggeriment
Er Ajuntament de Vielha e Mijaran a finalizat era redaccion deth Plan Locau de Joenessa. Aguest estrument municipau preten establir es linhes a seguir entà qu’es joeni e joenes de Vielha e Mijaran siguen es protagonistes dera sua vida sociau, en tot planificar es recorsi economics, sociaus, politics e materiaus entà qu’era joenessa age responsa as sòns besonhs.
Ara madeish aguest Plan Locau de Joenessa se trape en periòde d’exposicion ath public pendent 15 dies entà que quinsevolh persona pogue presentar beth suggeriment. Eth plan a previst èster vigent enquia 2021.
Eth plan s’a amiat a tèrme pendent diuèrsi ans damb era collaboracion dera tecnica compartida dera Oficina de Joenessa, Estefania Revilla, es tecnics dera Generalitat de Catalunya, atau coma des principaus sectors de joenessa de Vielha e Mijaran. En aguest sens, entà poder conéisher es besonhs des joeni, s’a realizat un procés participatiu previ entà qu’aguest sector dera societat podesse opinar e exposar es sues prioritats. En 2018 s’amièc a tèrme ua jornada de dinamiques de grup ena Escòla Garona, entà poder conéisher prigondament quini son es besonhs e es inquietuds qu’an es joeni deth municipi. En aguesta amassada de trabalh i sigueren presents bona part des representants de diuèrses associacions de Vielha e Mijaran. Tanben s’an hèt enquèstes entà ampliar es coneishences sus es joeni.
Aguest Plan Locau de Joenessa de Vielha e Mijaran neishec a compdar deth convèni signat entre er Ajuntament de Vielha e Mijaran e eth Conselh Generau d’Aran en tot compartir era figura dera tecnica de joenessa, e qu’includís es criteris de gestion deth Centre de Joenessa “Antara” inaugurat eth passat 22 de deseme.
Precisament, ua des finalitats d’aguest plan ère era creacion d’aguest Centre de Joenessa, qu’ei dubèrt pendent totes es dimenjades en antic aucidèr de Vielha. Aguest espaci ei dirigit as joeni, en tot èster un equipament qu’a de servir entà qu’aguesti agen un lòc a on amassar-se e poder amiar a tèrme activitats e accions qu’agen en comun e, d’aute biais, que servisque coma espaci a on se pogue parlar sus totes es problematiques e es besonhs qu’apareishen ena sua vida vidanta e poder meter-i remei. D’aguesta manèra, serà un centre a on compartir e apréner valors que les ajuden a desvolopar-se, pr’amor que son eth futur dera nòsta societat.
Per tant, a despièch de qu’er Ajuntament de Vielha e Mijaran facilite eth centre, es joeni son es sòns protagonistes e se l’an de hèr sòn, entà adaptar-lo a çò qu’an de besonh.