Notícies Veir istoric
Er Ajuntament de Vielha e Mijaran comence era reforma dera Sala Polivalenta de Vielha tà convertir-la en futur auditòri municipau
A d’aguest equipament que permeterà acuélher convencions se li apariarà eth tet, atau coma er enlumenat interior, era entrada e era façada exteriora, mès era reforma complèta ei prevista en diuèrses fases
Aguesta primauera an començat es òbres de reforma dera Sala Polivalenta de Vielha. Er Ajuntament de Vielha e Mijaran a iniciat era 1èra fasa de melhora d’aguest equipament, que consistís principaument ena melhora e mantenement dera estructura. Er objectiu ei qu’aguest equipament sigue un auditòri que pogue perméter acuélher convencions enes pròplèus ans. Aguesta reforma s’amiarà a tèrme en diuèrses fases, de manèra qu’era sua finalizacion ei prevista a diuèrsi ans vista.
En aguesta prumèra fasa s’amie a tèrme er apariament deth tet e des elements que lo formen, pr’amor que se trapen en un estat fòrça deficient, e d’aguesta manèra s’esvitarà que i age mès filtracions d’aigua e que pogue perjudicar eth solèr e empedir qu’es usatgèrs poguen hèr-se mau mentre l’empleguen en bèra ua des activitats. Ath delà se substituirà er enlumenat interior, en tot installar enlumenat LED, pr’amor qu’ei fòrça mès sostenible e mès economic. E, fin finau, tanben s’amiarà a tèrme ua reforma dera façada exteriora, qu’ei fòrça deteriorada e lorda, e a de besonh un lauat d’imatge urgent.
Pendent era execucion d’aguestes òbres era installacion demorarà barrada ath sòn emplec entara practica esportiua.
Aguesta reforma dera Sala Polivalenta supause era finalizacion dera adeqüacion d’un parçan, a on en 2018 ja se realizèc era reforma dera Plaça d’Aran, e era reforma dera Plaça dera Generalitat per part der Ajuntament, en tot deishà’c ben endreçat.