Notícies Veir istoric
Er Ajuntament de Vielha e Mijaran daurís un procès de participacion publica entà elaborar e aprovar eth “Plan Locau de Seguretat Viària de Vielha e Mijaran 2025-2028”
Se daurís un periòde de 20 dies abils (enquiath 26 de març) entà respóner ua enquèsta que permeterà auer un màger coneishement dera matèria per part dera ciutadania, e qu’ei disponibla ena plana web deth consistòri
Er Ajuntament de Vielha e Mijaran a iniciat un procès de participacion publica damb er objectiu d’elaborar eth tèxte deth futur “Plan Locau de Seguretat Viària de Vielha e Mijaran 2025-2028” (PLSV), coma estrument de planificacion estrategica municipau entà auançar de cap ara “Vision Zèro” (reduccion progressiua des victimes mortaus e grèus) e milhorar era seguretat de toti es usatgèrs, damb especiau atencion as collectius mès vulnerables (pedons, ciclistes e usatgèrs de VMP).
Aguest Plan balharà contunhitat as estruments municipaus prealables (PLSV 2010-2013 e actualizacion 2014-2018) e actualizarà es prioritats a compdar dera experiéncia acumulada e des cambiaments ena mobilitat locau. En aguest marc, s’i intègre eth desplegament deth projècte “Ciutat 30”, orientat a pacificar eth transit en encastre urban e escolar e a ordenar es itineraris segurs a pè e en biciclèta.
Ei de besonh disposar d’un marc de planificacion que definisque objectius, accions prioritàries e mecanismes de seguiment entà milhorar era seguretat viària ath municipi. Eth Plan permet ordenar es mesures fisiques, es accions de gestion e es contraròtles preventius, atau coma es accions d’educacion e conscienciacion, damb critèris transparents e avaluables.
Es objectius d’aguest PSLV son: redusir un 20% es accidents ena zòna urbana en 2028 respècte era mejana 2020-2023, mantier e assolidar era ”Vision zèro”: zèro mòrts e zèros herits grèus damb sequèles tà tota era vida enes accidents de transit, redusir eth pes des atropelhaments en conjunt d’accidents, en tot actuar sus itineraris a pè, accessibilitat e visibilitat, impulsar mesures fisiques de milhora der espaci public e era infrastructura viària (pacificacion dera velocitat, senhalizacion, passi de pedons e punts conflictius), refortilhar es mesures preventives: contraròtles e disciplina sancionadora orientada as infraccions que genèren risc, e accions d’educacion entara mobilitat segura.
Era ciutadania e es organizacions qu’ac considèren avient pòden, en exercici deth dret que lis arreconeish er article 133.1 dera Lei 39/2015, deth procediment administratiu comun des administracions publiques, reméter es sues opinions e aportacions sus es aspèctes sometudi, pendent eth tèrme de vint (20) dies abils a compdar d’aué. Es persones interessades poderàn respóner era enquèsta a trauès deth següent ligam: https://vielhaparticipa.my.canva.site/
Aguesta enquèsta ei abilitada enes tres idiòmes oficiaus: aranés, castelhan e catalan.
Er Ajuntament de Vielha e Mijaran encorage a tota era ciutadania a participar activaments en aguest procès, contribuïnt atau a elaborar un plan que respone as besonhs reaus deth municipi.
Atau madeish, s’a abilitat un corrèu electronic de participacion ciutadana entà que quinsevolh persona pogue hèr aportacions, e que seràn degudaments incorporades ena consulta. Aguest corrèu ei participacion@vielha-mijaran.org
Segontes soslinhe eth baile de Vielha e Mijaran, Juan Antonio Serrano, “volem qu’aguest Plan Locau de Seguretat Viària sigue frut deth dialòg e dera participacion ciutadana. Vielha ei ua poblacion fòrça transitada, sustot en iuèrn e ostiu, e que compde damb zònes d’especiau atencion, coma son es entorns escolars (Escòla Garona, Institut d’Aran e Escòla Mairau “Era Cunhèra”), as que cau aufrir ua especiau seguretat”. E ahig que “invertir en seguretat viària ei invertir en qualitat de vida, en tranquillitat entà toti, en tot garantir un milhor futur”.
Lieger mès
26/02/2026
Er Ajuntament de Vielha e Mijaran recep era autorizacion per part dera Confederación Hidrográfica del Ebro entà desvolopar milhores en lhèt der arriu Garona ath sòn pas per Vielha e Betren
Lieger mès
24/02/2026
Er Ajuntament de Vielha e Mijaran intensifique era neteja enes ièrles de contienedors e auance eth baldejament de carrèrs dempús des temporaus d’aguest iuèrn
Lieger mès
14/02/2026
Er Ajuntament installe malhes entà esvitar esguitlades enes passarèles de husta des arrius Nere e Garona entà refortilhar era seguretat en iuèrn
Lieger mès
