Notícies Veir istoric
Es dies 17 e 18 d’abriu se celèbre eth IX Tornèg Femenin de Fotbòl Sala de Vielha
Es inscripcions ja s’an daurit entad aguesta competicion que se disputarà en Palai d’Espòrts de Vielha pendent es hèstes de Pasca
Arriben es hèstes de Pasca, e damb eres un des classics esportius des darrèri ans en Vielha e Mijaran: Eth Tornèg Femenin de Fotbòl Sala de Vielha qu’organize era AEFA (Associacion Esportiua Fotbòl Aran) amassa damb era Penha Barcelonista dera Val d’Aran. Enguan aguesta competicion arribe ara 9au edicion, en tot auer-se assolidat coma un referent esportiu en municipi.
Pendent es dies 17 e 18 d’abriu eth Palai d’Espòrts de Vielha torne a èster er escenari d’un tornèg que compde damb era collaboracion der Ajuntament de Vielha e Mijaran e es inscripcions ja son dubèrtes a toti es equips que siguen interessadi en participar-i.
Entà formalizar era inscripcion, es jogadores auràn d’aumplir era huelha d’inscripcion e liurar-la ara direccion de corrèu electronic: eraliga@gmail.com abantes deth pròplèu 15 d’abriu. Eth prètz dera inscripcion ei de 60 èuros per equip e s’aurà de pagar es deluns, dimèrcles e diuendres entre es 17:00 e es 19:30 en Palai d’Espòrts. En cas d’èster jogadores de mens de 18 ans, auràn de liurar era autorizacion signada pes pairs/mairs.
Totes es jogadores receberàn un present, un diplòma damb era classificacion artenhuda, es tres melhors equips receberàn un trofèu, ath delà dera melhora jogadora e era maximala golejadora que s’emportaràn un obsèqui des Termas Baronia de Les.
Eth sistèma de jòc se comentarà pendent era jornada de dimars 16 d’abriu, un viatge se coneishe era donada exacta d’equips que participen ena competicion e se facilitarà eth calendari de partits.