Notícies Veir istoric
Vielha e Mijaran destinarà lèu 600.000€ a inversions en municipi damb era aprobacion dera 2au modificacion de credit
Aguesta modificacion, que ja ère prevista en inici der an, se poderà executar gràcies ath superavit artenhut en an 2018 e ath decrèt estatau que permet as ajuntaments invertir aguest superavit en Inversions Financerament Sostenibles
Eth plen der Ajuntament de Vielha e Mijaran a aprovat ena session extraordinària celebrada aguest dimèrcles era 2au modificacion de credit deth pressupòst de 2019 per valor d’1.347.380,96€, que s’amie a tèrme gràcies en bona part ath superavit artenhut enes compdes der an 2018 e ath decrèt estatau aprovat a finaus de març que permet as administracions locaus era inversion de part deth superavit entà Inversions Financerament Sostenibles.
En Vielha e Mijaran, damb aguesta modificacion de credit se destinaràn pròp de 600.000€ a inversions en municipi, des quaus 479.000 seràn Inversions Financerament Sostenibles.
Per un costat, en tot contunhar damb es òbres de melhora des depòsits d’aigua municipaus que s’an amiat a tèrme pendent es darrèri ans, enguan se realizaràn trabalhs de reabilitacion des depòsits d’Arròs e Vila que se trapen en un estat fòrça deficient, damb er objectiu de melhorar es condicions de vida e era salut des vesins d’aguesti pòbles. Laguens d’aguest paquet de mesures, tanben ei prevista era implementacion d’un sistèma de telecontrol der estat deth clòro en conjunt des depòsits municipaus.
D’aute biais, s’amiarà a tèrme era pavimentacion deth passeg fluviau ath long dera Solana de Vielha parallèlament ar arriu Garona. Ath delà, i aurà un seguit de trabalhs de reforma des trepaders ena part nauta dera Avenguda Pas d’Arró, ena Avenguda deth Solan e deuant dera Escòla Garona. E, tanben s’invertirà en trabalhs d’adoquinat en Carrèr Bergàs.
Ath delà, era darrèra des accions inclodides coma Inversion Financerament Sostenible que serà ua realitat enguan, ei eth bastiment dera pista poliesportiua exterior (multijòcs) ath cant dera actuau pista de pàdel deth Palai de Gèu de Vielha. Ua installacion que permeterà qu’es joeni deth municipi agen un espaci a on poder practicar diuèrsi espòrts ar aire liure pendent bona part der an.
D’autes accions que hèn part d’aguesta modificacion de credit son era renovacion des biciclètes de spinning e es desumificadors deth Palai de Gèu, e qu’anarà acompanhat dera subvencion annau per part dera Deputacion de Lleida. Tanben s’amiarà a tèrme ua melhora des quadres electrics der enlumenat public, e s’autrejarà ua subvencion tà qu’eth pòble de Mont pogue auer un parc infantil enes condicions avientes entara mainadèra.