Notícies Veir istoric
Un centenat d’alumnes des escòles de Vielha, Benasc e Luishon an participat en ua jornada de convivéncia ena natura en parçan der antic Espitau de Vielha
Aguesta activitat forme part deth projècte Interreg POCTEFA “Reiaume der Aneto” en qu’er Ajuntament de Vielha e Mijaran i trabalhe pendent es darrèri ans amassa damb es ajuntaments de Benasc e Luishon
Pendent eth maitin d’aguest diuendres, un centenat de mainatges e mainades arribadi des escòles de Vielha, Benasc e Luishon an participat ena activitat de convivéncia ena natura en parçan der antic Espitau de Vielha (Boca Sud deth Tunèl de Vielha).
Aguesta accion, que se trape laguens deth projècte Interreg POCTEFA “Reiaume der Aneto” a on participe er Ajuntament de Vielha e Mijaran pendent es darrèri ans, a supausat ua gran oportunitat entà amassar a fòrça mainatges arribadi des diuèrses vessants des Pirenèus.
Ath long deth maitin, es alumnes an podut conéisher de prumèr man era zòna der antic Espitau de Vielha, en tot entrar ena ermita de Santa Quitèria e eth refugi de Sant Nicolau. Atau madeish, dera man des guides de montanha Ricard Novell e Lola López, an podut descorbir fòrça endrets naturaus d’aguest parçan, en tot prigondir en coneishement deth miei, en un airau que destaque peth sòn patrimòni istoric en tot realizar desparières activitats de grop.
Ua jornada, que dempús des activitats ena natura, a acabat damb un dinar de germanor en Vielha tà fomentar era bona relacion entre era mainadèra des diuèrses escòles.
Eth projècte POCTEFA preten qu’es tres municipis poguen realizar accions de desvolopament sostenible a partir de recorsi naturaus, païsatgistics e culturaus, en tot profitar era demanda toristica. Pendent aguesti ans, s’an amiat a tèrme fòrça acccions en aguest sentit, enes airaus culturau, toristic e sociau.
10/05/2019