Notícies Veir istoric
Eth Plen der Ajuntament de Vielha e Mijaran apròve iniciaument eth Plan Locau de Joenessa
Aguest Plan preten èster er estrument que permeterà hèr politiques de joenessa, en tot establir es linhes a seguir entà qu’es joeni e joenes deth municipi siguen es protagonistes dera sua vida sociau, en tot planificar es recorsi economics, soc
Pendent era jornada d’aguest dimèrcles, eth plen der Ajuntament de Vielha e Mijaran a aprovat per unanimitat eth Plan Locau de Joenessa que serà vigent enquia 2021. Aguest plan siguec a exposicion publica entà que quinsevolh persona podesse presentar quinsevolh tipe de suggeriment. Un viatge acabat aguest periòde, eth plen a ratificat era sua aprobacion iniciau.
Aguest plan preten aufrir ues linhes a seguir ara joenessa entà que poguen apréner a víuer en democràcia, damb valors coma era tolerància, era convivéncia, eth companherisme e eth respècte.
Un plan que s’a amiat a tèrme pendent diuèrsi ans damb era collaboracion dera tecnica compartida dera Oficina de Joenessa, Estefania Revilla, es tecnics dera Generalitat de Catalunya, atau coma des principaus sectors de joenessa de Vielha e Mijaran. En aguest sens, entà poder conéisher es besonhs des joeni, s’a realizat un procés participatiu previ entà qu’aguest sector dera societat podesse opinar e exposar es sues prioritats. En 2018 s’amièc a tèrme ua jornada de dinamiques de grup ena Escòla Garona, entà poder conéisher prigondament quini son es besonhs e es inquietuds qu’an es joeni deth municipi. En aguesta amassada de trabalh i sigueren presents bona part des representants de diuèrses associacions de Vielha e Mijaran. Tanben s’an hèt enquèstes entà ampliar es coneishences sus es joeni.
Ua des finalitats d’aguest plan ère era creacion d’aguest Centre de Joenessa, qu’ei dubèrt pendent totes es dimenjades en antic aucidèr de Vielha. Aguest espaci ei dirigit as joeni, en tot èster un equipament qu’a de servir entà qu’aguesti agen un lòc a on amassar-se e poder amiar a tèrme activitats e accions qu’agen en comun e, d’aute biais, que servisque coma espaci a on se pogue parlar sus totes es problematiques e es besonhs qu’apareishen ena sua vida vidanta e poder meter-i remei. D’aguesta manèra, serà un centre a on compartir e apréner valors que les ajuden a desvolopar-se, pr’amor que son eth futur dera nòsta societat.
D’aute biais, eth plen tanben a aprovat era composicion deth listat e es nombres deth carrerèr deth municipi.