Notícies Veir istoric
Er Ajuntament de Vielha e Mijaran realize diuèrsi trabalhs de melhora enes pistes de fronton e de skate
Pendent aguesta setmana s’amien a tèrme trabalhs de pentura e apariament des horats existents ena paret principau deth fronton, atau coma eth plaçament d’un nau sistèma d’enlumenat en ambdús equipaments
Pendent aguesta setmana, er Ajuntament de Vielha e Mijaran realize un conjunt de trabalhs entà melhorar er estat des pistes de fronton e de skate plaçades en Eth Solan de Vielha.
Per un costat, s’amien a tèrme trabalhs de pentura e apariament des horats existents ena paret principau deth fronton, pr’amor que damb eth sòn emplec e era climatologia advèrsa der iuèrn, aguesta superfícia auie de besonh ua melhora entà qu’es usatgèrs la poguen emplegar enes condicions avientes damb era arribada der ostiu.
Atau madeish, ei previst cambiar eth sistèma d’enlumenat d’aguesta pista de fronton e ena de skate (en aguesta serà eth prumèr viatge que n’i aurà), en tot installar dus potents foguièrs damb temporizador, entath sòn emplec quan sigue de net.
Un viatge finalizadi aguesti trabalhs, ei previst qu’enes pròplèu setmanes tanben s’amie a tèrme era ampliacion des tanques que i a ena pista de fronton, damb tanques mès estretes entà esvitar qu’es pilòtes se queden atrapades, e d’aguesta manèra tornen a quèir en solèr. E, es darrèri trabalhs, supausaràn era collocacion de diuèrsi bancs e paperères n’aguesta zòna esportiua, ath torn dera pista de fronton e era de skate, entà refortilhar era qualitat e era berèsa n’aguest espaci, en tot suenhar er entorn naturau.
“Damb aguesti trabalhs qu’auem començat aguesta setmana, e que s’alongaràn pendent diuèrses setmanes, volem melhorar er estat d’aguesti equipaments esportius que son fòrça importants entà Vielha e Mijaran e, d’aguesta manèra, qu’es usatgèrs les poguen gaudir damb era màger qualitat possibla, en tot deishar eth conjunt esportiu damb es condicions avientes entara sua practica esportiua damb era arribada der ostiu”, comente eth còsso d’Espòrts, Alberto López.