Notícies Veir istoric
Er Ajuntament de Vielha e Mijaran amie a tèrme ua session formativa as sòns trabalhadors sus er emplec deth lenguatge non sexiste
Aguesta accion s’inclodís laguens deth marc deth Plan d’Igualtat d’Oportunitats entre Hemnes e Òmes de Vielha e Mijaran (2018-2021), aprovat peth consistòri enguan
Er Ajuntament de Vielha e Mijaran auance damb eth desplegament deth Plan d’Igualtat d’Oportunitat entre Hemnes e Òmes de Vielha e Mijaran (2018-2021). Pendent es dies 5 e 6 de junh amie a tèrme ua formacion as sòns trabalhadors sus er emplec corrècte deth lenguatge non sexiste. Aguesta formacion preten mostrar es errors abituaus que s’acostumen a hèr en moment de redactar quinsevolh tipe d’escrit o document, e que se pòden reprodusir en tot parlar, e d’aguesta manèra corregir-les e hèr-ne un emplec avient.
Ena formacion s’apren a esvitar es usatges sexistes e androcentrics deth lenguatge, atau coma er usatge igualitari e non discriminatòri dera lengua entre òmes e hemnes, en tot garantir-lo e visibilizar as hemnes, qu’an estat discriminades tradicionaument en lenguatge.
“Des der Ajuntament contunham en tot auançar ena potenciacion dera igualtat d’oportunitats entre genres, damb accions concrètes coma ei era formacion des trabalhadors dera administracion, en tot cercar arténher un modèl just de relacions sociaus entre hemnes e òmes”, afirme era còsso d’Accion Sociau, Maria Vergés.
Eth Plan siguec aprovat peth plen der Ajuntament eth passat mes de gèr, damb er objectiu d’arténher era igualtat d’oportunitats entre genres, en tot desvolopar un conjunt d’activitats (corsi, talhèrs, conferéncies...), pr’amor qu’era educacion, era conscienciacion e era formacion en matèria de genre son claus entà trabalhar e arténher aguesta igualtat reau.
05/06/2019