Notícies Veir istoric
Fabienne Sans mòstre es rèptes deth Garona
En ua conferéncia ena sala de plens der Ajuntament de Vielha e Mijaran
Diuendres 26 de seteme, se celebrèc era conferéncia ‘El Garona, unión entre culturas: France/Val d’Aran’ dera man de Fabienne Sans, membre deth Syndicat mixte d’études et d’aménagement de la Garonne (SMEAG), ena sala de plens der Ajuntament de Vielha, en ua naua activitat deth projècte Sud’Eau 2.
Entà començar era charrada, eth ponent presentèc er SMEAG e mostrèc diuèrses des accions que realize entà preservar e recuperar era vida, socioculturau e naturau, ath torn deth Garona. Ara seguida descriuec er arriu transfronterièr en quate zònes geografiques: era sua part mès montanhuda, era desbordanta, era mejana e era maritima.
Sus era situacion dera Val d’Aran en relacion damb eth Garona, era conferencianta expliquèc diuèrses mesures que s’an amiat a tèrme entà melhorar era accessibilitat ar arriu e era sua vegetacion, coma era recuelhuda de residus flotants o era elaboración d’un camin transfronterièr.
Entà concludir era sua presentacion, Sans metec sus era taula es rèptes mès importants der arriu Garona en sòn futur mès a tocar, entre es que destaquen: conservar era sua varietat d’ecosistèmes damb 2.500 km quarradi de zònes naturaus; melhorar era qualitat e repartir era quantitat der aigua; e cercar solucions non agressives entà minimizar eth damatge des inondacions.
Aguesta conferéncia s’enquadre laguens deth projècte Sud’Eau 2 e preten hèr préner consciéncia ara ciutadania sus era importància dera preservacion der aigua e es arrius. Enes pròplèus setmanes se realizaràn mès eveniments en Vielha que tanben se tròben laguens deth Sud’Eau 2.