Notícies Veir istoric
Aguest maitin s’a constituït era naua Corporacion Municipau de Vielha e Mijaran
Juan Antonio Serrano a tornat a èster escuelhut coma nau baile municipau e tanben an prenut possession es presidents des EMDS de Vielha e Mijaran
Aguest maitin a demorat constituïda era naua Corporacion Municipau de Vielha e Mijaran entara legislatura 2019-2023, qu’ei conformada per nau còssos d’Unitat d’Aran, tres de Convergéncia Democratica Aranesa e un d’Aran Amassa.
Pendent er acte tanben s’a tornat a escuélher a Juan Antonio Serrano (UA), coma nau baile de Vielha e Mijaran, en tot renauir eth cargue que ja exercie pendent aguesta darrèra legislatura.
“Sò fòrça content de poder contunhar coma baile de Vielha e Mijaran, entà poder seguir damb fòrça projèctes e accions destinades a melhorar eth benéster dera ciutadania de tot eth municipi, en tot garantir es servicis basics e amiar a tèrme tot çò que sigue de besonh entà fomentar ua melhor qualitat de vida dera gent”, comente Juan Antonio Serrano. E hig que “seguiram en tot auer es pòrtes dubèrtes der Ajuntament entà toti, pr’amor qu’eth nau equip de govèrn vò contunhar en tot auer es mans estenudes ara gent, e escotar es sues preocupacions e es sòns suggeriments. Eri son es principaus beneficiadi dera accion politica municipau, e per eri trabalham e trabalharam pendent cada dia, en tot èster ath sòn costat”.
Per un aute costat, Serrano tanben a volut destacar era grana preséncia femenina ena naua Corporacion, pr’amor que des tretze còssos que la formen, i aurà sies hemnes: cinc d’Unitat d’Aran e ua de Convergéncia Democratica Aranesa. “Era paritat de genre ena politica a d’èster un exemple de cara ara ciutadania entà arténher era igualtat en carrèr, e ena aguesta naua legislatura i aurà ua nauta preséncia de hemnes. Unitat d’Aran a cinc representantes femenines, e cinc òmes. Ua mòstra de qu’apostam per aguesta igualtat, qu’a d’èster cada viatge mès abituau en sègle XXI”, concludís Serrano.
Fin finau, tanben an prenut possession es sèt presidents des Entitats Municipaus Descentralizades de Vielha e Mijaran entà barrar er acte.
16/06/2019