Notícies Veir istoric
Grupo Elias guanhe era 12au edicion des 30 Ores de Fotbòl Sala Vila de Vielha, en tot derrotar per 7-2 a Free Palestina ena finau
Er equip de Lleida repetís títol per dusau an consecutiu, en ua competicion qu’enguan a amassat a 14 equips dera Val d’Aran, Lleida, Barcelona, Girona e Tarragona
Grana
competicion era que s’a viscut en Palai d’Espòrts de Vielha pendent
aguesta dimenjada damb era 12au edicion des 30 Ores de Fotbòl Sala
Vila de Vielha. Un classic der espòrt de primauera en Vielha e
Mijaran, e qu’enguan a agut
un totau de 14 equips dera
Val d’Aran, de Lleida, Barcelona, Girona e Tarragona.
Aguesta 12au edicion a estat guanhada peth Grupo Elias de Lleida, qu’a superat ena finau ath Free Palestina per 7 gòls a 2, en un partit qu’a estat fòrça igualat enquias darrères menutes, mès era experiéncia des bicampions a hèt que fin finau guanhèssen un aute viatge aguest torneg.
Pendent aguest torneg i a agut ua ampla varietat de prèmis entàs jogadors. Eth prèmi a melhor portièr a estat entà David Benito, der equip de Vilanova. Carlos Contreras, tanben deth Vilanova, se n’a emportat eth prèmi ath maxim golejador. Eth prèmi a melhor jogador deth torneg a estat entà Isma Kasseny deth Free Palestina. Mencion especiau cau hèr ath prèmi “Tonet Cavero” ara esportivitat, qu’enguan a estat liurat ara organizacion dera Liga de Fotbòl Sala dera Val d’Aran, per fomentar era practica d’aguest espòrt. Tanben cau remercar qu’era organizacion deth torneg a reconeishut as jogadores der equip Nikelodigas, per èster eth prumèr equip femenin que participe enes 30 Ores de Fotbòl Sala Vila de Vielha. Ath delà, Laura Riquelme, jogadora aranesa deth Toulouse femenin a recebut un reconeishement per part des organizadors, dempús de qu’age artenhut èster convocada pera seleccion sub19 francesa.
Abans dera celebracion dera finau des 30 ores, s’a jogat era finau deth torneg infantil Objectiu 30 ores, a on es jogadors der Inter d’Aran an guanhat per 4-0 ara Montañesa A. Aguest torneg a era sua importància, pr’amor qu’aguesti joeni esportistes seràn eth futur deth torneg des 30 ores des adults.
“Aguesta 12au edicion des 30 Ores de Fotbòl Sala Vila de Vielha a tornat a èster un gran exit de participacion. 14 equipes autant locaus coma de desparièrs punts de Catalonha an prenut part dera competicion, en tot assolidar-se coma un classic der espòrt de Vielha e Mijaran”, comente eth baile de Vielha e Mijaran, Juan Antonio Serrano.
Ath delà, Serrano tanben a remercat “era nauta preséncia de public pendent bona part deth torneg, en tot demostrar qu’aguesta competicion desvelhe fòrça interès entre era gent deth municipi e deth conjunt dera Val d’Aran”. E hig que “des der Ajuntament volem arregraïr autant as participaires coma ara organizacion, per auer artenhut qu’age estat un gran exit esportiu pendent aguesta dimenjada”.