Notícies Veir istoric
Vielha e Mijaran encète eth 29 de junh eth periòde de competicions esportives damb era 14au edicion dera Pedals de Foc Non Stop
Mès de 1000 participaires preneràn part d’aguesta pròva de BTT de 213 kms e qu’a Vielha coma lòc de gessuda e d’arribada
Aguest pròplèu dissabte 29 de junh a lòc era 14au edicion dera Pedals de Foc Non Stop. Ua des competicions de BTT mès importantes a nivèu nacionau e europèu, que compde damb un totau de 213 kms e 6300 mètres de desnivèu positiu.
Aguesta competicion a Vielha com lòc de gessuda e d’arribada, e enguan artenh un nau recòrd d’inscrits damb mès de 1000 participaires, en tot recórrer bona part dera geografia dera Val d’Aran, e es comarques vesies dera Alta Ribagorça, Pallars Sobirà e Pallars Jussà.
Era Pedals de Foc Non Stop ei ja un classic des pròves esportives en Vielha e Mijaran, en tot plaçar-se coma eth punt iniciau deth calendari de granes competicions esportives en ostiu, e que finalizarà en octobre. Se demore qu’er impacte economic qu’aurà aguesta pròva en municipi serà de mès de 350.000€, en tot beneficiar-se tot eth sector toristic pendent aguesta dimenjada. Se calcule que mès de 3000 persones (entre participaires e acompanhants) se lotjaràn en conjunt des otèls.
En parcatge des antigues casèrnes militares i aurà plaçada ua grana carpa a on s’aufriràn toti es servicis qu’an de besonh es participaires abans e dempús dera pròva.
Ath long dera competicion i aurà plaçadi diuèrsi contròtles de pas: Vielha (Km 0), Vilaller (Km 32,7), Castellars (Km 61,6), Les Esglésies (Km 81,5), Espui (Km 101,8), Coll de Triador (Km 113,5), Espot (Km 143,5), Son (Km 156,1), Alòs d’Isil (Km 168), Montgarri (Km 185,5) e Vielha (Km 213).
Era gessuda s’amiarà a tèrme entàs 05:00, en tot èster barrat er accès ath Tunèl de Vielha entre es 05:30 e es 06:00 mentre acaben de passar toti es participaires.
D’aute biais, pendent tota era jornada deth 29 de junh, eth carrèr Querimònia demorarà barrat ath transit. Era gessuda e era arribada dera pròva s’efectuarà en aguest carrèr.
“Èm satisfèti de poder acuélher ua naua edicion dera Pedals de Foc Non Stop. Ua competicion damb fòrça nòm, ena que i a participaires de diuèrsi païsi, e que met Vielha e Mijaran en mapa internacionau a nivèu esportiu”, comente eth baile de Vielha e Mijaran, Juan Antonio Serrano. E hig que “era nauta repercusion economica qu’a era competicion pendent aguesta dimenjada, permet encetar damb bon pè er ostiu, en tot beneficiar-se eth conjunt deth municipi de Vielha e Mijaran”.