Notícies Veir istoric
Der 1 ath 7 de junhsèga se celèbre eth 2au Val d’Aran Walking Festival
En Vielha e Mijaran s’amiaràn a tèrme excursions per entorn naturau, i aurà actuacion de balhs aranesi e degustacion de productes locaus
Pendent er 1 e eth 7 de junhsèga, se celèbre era 2au edicion deth Val d’Aran Walking Festival, organizat pera enterpresa Camins. Ath long d’aguesta setmana, es 150 participaires gaudiràn d’excursions per lòcs emblematics dera Val d’Aran coma eth Saut deth Pish o es Uelhs deth Joeu e ascensions a montanhes coma eth Tuc d’Aubàs, Tuc dera Salana, o Tuc dera Escaleta.
Dempús der exit der an passat, enguan aguest eveniment ven damb diuèrses nauetats: trauèssa des deth Hospice de France enquia Bossòst, peth Còth de Baretja, damb era opcion de pujar ath Tuc d’Aubàs, eth Guardadèr der Aneto. Tanben se visitarà era Mina Victòria d’Arres e s’acabarà damb era Marxa Naut Aran.
En Vielha i aurà ua actuacion de balhs aranesi eth 2 de junhsèga a compdar des 20:00, damb degustacion de doci tipics e moscatelh. Tanben i aurà visites ara fabrica de cervesa artesanau en Bossòst, degustacion de productes dera mèrca de garantia dera Val d’Aran enes Banhs de Tredòs, se visitarà eth parc de flòra e fauna Aran Park en Portilhon e i aurà degustacion deth hormatge que s’elabòre en Bagergue. Ath delà, i aurà un talhèr de plantes medicinaus.