Notícies Veir istoric
Vielha compdarà damb un Punt Lila pendent era Hèsta Major entà esvitar e denonciar agressions sexistes
Vielha e Mijaran compdarà damb un Punt Lila pendent era Hèsta Major entà esvitar e denonciar agressions sexistes Laguens des accions previstes en Plan d’Igualtat d’Oportunitats deth municipi, aprobat ena passada legislatura, s’articule ua campanha contra es agressions sexuaus enes hèstes majors e moments d’òci nocturn ena que se pòrte trabalhant de finaus de 2018 ençà.
Er airau d’Igualtat der Ajuntament de Vielha e Mijaran, en tot coïncidir damb es Hèstes Majors, e laguens dera estratègia de prevencion d’agressions sexistes en contèxtes d’òci e hèstes, premanís diuèrses accions de conscienciacion e sensibilizacion sus aguest ahèr. Damb es lèmes prebotjadi enes darrèri tempsi a trauès de campanhes a nivèu generau, coma “Non ei Non”, “Malamente” e “Sonque ÒC ei ÒC”, Vielha e Mijaran se hig ad aguestes iniciatives de refús ara violéncia de genre e prebotge ues hèstes sense agressions sexistes, en tot amiar a tèrme ua campanha especiau en hilats sociaus que s’alongarà e refortirà enquiàs dies dera Hèsta Major. Atau madeish se preten dar-li contunhitat pendent era rèsta der an enes locaus d’òci nocturn deth municipi. Es Hèstes Majors, ath delà de temps de diversion e conviuença, tanben son en ocasions scenari d’agressions sexistes e conductes masclistes. Entà sajar d’esvitar-les e arturar-les, er Ajuntament de Vielha e Mijaran installarà enguan, per prumèr viatge, un Punt Lila es dies 7, 8, 9 e 10 de seteme que serà a disposicion de tota era ciutadania ena entrada dera Sala de Hèstes entà aconselhar, informar e ajudar a totes aqueres hemnes que siguen victimes de sètge o volguen denoncià’c.
12/08/2019